ដោយៈ និស្ស័យ
ភ្នំពេញៈ ទេសរដ្ឋមន្ត្រីទទួលបន្ទុកបេសកកម្មពិសេស បានលើកឡើងថា ប្រយោជន៍ដែលកម្ពុជាអាចទាញបាន ពីការក្លាយជាសមាជិកកិច្ចព្រមព្រៀង RCEP ដែលអាចពង្រីកទីផ្សារនាំចេញកាន់តែទូលំទូលាយ គ្រប់ដណ្តប់ទីផ្សារអ្នកប្រើប្រាស់ជាង២,២ពាន់លាននាក់ជាមួយទំហំពាណិជ្ជកម្មដោះដូរជាង២៦ទ្រីលានដុល្លារ។
ការថ្លែងបែបនេះ របស់លោកសាស្ត្រាចារ្យបណ្ឌិតសុក ស៊ីផាន់ណា ទេសរដ្ឋមន្ត្រីទទួលបន្ទុកបេសកកម្មពិសេស និងទីប្រឹក្សារាជរដ្ឋាភិបាលក្នុងកម្មវិធីបើកបាឋកថាស្តីពី “កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់(RCEP)៖ ទិដ្ឋភាពភូមិសាស្ត្រនយោបាយ និងភូមិសាស្ត្រសេដ្ឋកិច្ច” នាថ្ងៃទី១៣ ខែកញ្ញា ឆ្នាំ២០២៣ នៅទីស្ដីការក្រសួងព័ត៌មាន។
លោកទេសរដ្ឋមន្ត្រី បានបញ្ជាក់ថា កិច្ចព្រមព្រៀង RCEP ជាកិច្ចព្រមព្រៀងសេរីធំបំផុត ពោលគឺធំជាងគេនៅក្នុងតំបន់ ហើយបើប្រៀបធៀបកម្រិតពិភពលោក ជាប់លេខ២ បន្ទាប់ពីកិច្ចព្រមព្រៀង WTO។
លោកបញ្ជាក់ថា “កម្ពុជាជាសមាជិកមួយ នៅក្នុងកិច្ចព្រមព្រៀង RCEP ដែលមាន១០ប្រទេសក្នុងអាស៊ាន រួមទាំងប្រទេស ៥ ទៀត មាន ចិន ជប៉ុន កូរ៉េ នូវែលសេឡង់ និងអូស្ត្រាលី។
ក្នុងឱកាសនេះដែរ លោកទេសរដ្ឋមន្ត្រី សុក ស៊ីផាន់ណា ក៏បានលើកឡើងនូវកត្តាសំខាន់ៗចំនួន៣ ដែលនាំឲ្យតំបន់អាស៊ី គឺជាមជ្ឈមណ្ឌលដ៏សំខាន់ សម្រាប់ការប្រកួតប្រជែងជំនាន់ថ្មី មិនថាតែក្របខណ្ឌកិច្ចព្រមព្រៀង ភាពជាដៃគូសេដ្ឋកិច្ចគ្រប់ជ្រុងជ្រោយ តំបន់ (RCEP) ឬកិច្ចព្រមព្រៀងសម្រាប់ភាព ជាដៃគូអន្តរប៉ាស៊ីហ្វិក (TPP)។
លោកទេសរដ្ឋមន្ត្រី បានបន្តថា មានហេតុផលសំខាន់ៗចំនួន៣ ដែលធ្វើឲ្យតំបន់អាស៊ី ក្លាយជាមជ្ឈមណ្ឌលដ៏សំខាន់ សម្រាប់ការប្រកួតប្រជែង គឺរួមមាន អាស៊ី ជាតំបន់ដែលមានកំណើនខ្ពស់ ជាមួយនឹងទីផ្សារកំពុងរីកចម្រើន អាស៊ី ជាប្រភពសំខាន់នៃវត្ថុធាតុដើម និង ឥទ្ធិពលរបស់អំណាចចិន។
លោកបន្តថា “ស្ថិតក្នុងបរិបទបច្ចុប្បន្ន តំបន់អាស៊ីកំពុងក្លាយជាគោលដៅដ៏សំខាន់ នៃការប្រកួតប្រជែងរបស់ប្រទេសធំៗ នៅលើពិភពលោក ទាំងលើទិដ្ឋភាពភូមិសាស្ត្រនយោបាយ និងភូមិសាស្ត្រសេដ្ឋកិច្ច”។
លោកទេសរដ្ឋមន្ត្រី សុក ស៊ីផាន់ណា មានសុទិដ្ឋិនិយមទុកថា នៅក្នុងរយៈពេល១០ ទៅ២០ឆ្នាំទៀត កម្ពុជាអាចពឹងផ្អែកលើកិច្ចព្រមព្រៀង RCEP នេះ តាមរយៈកំណើនការវិនិយោគ ដោយផ្ទាល់ពីបរទេស ហើយទំនិញពីកម្ពុជាអាចផលិតនាំចេញ ទៅប្រទេសដែលជាសមាជិកក្នុងកិច្ចព្រមព្រៀងនេះ។
កិច្ចព្រមព្រៀងស្តីពីភាពជាដៃគូសេដ្ឋកិច្ច គ្រប់ជ្រុងជ្រោយក្នុងតំបន់(RCEP) បានលេចចេញជារូបរាងពេញលេញ នៅក្នុងឆ្នាំ២០១២ អំឡុងពេលដែលកម្ពុជាធ្វើជាម្ចាស់ផ្ទះ ដឹកនាំកិច្ចប្រជុំកំពូលអាស៊ានលើកទី២១ នៅរាជធានីភ្នំពេញ៕