ដោយៈសុផល
ភ្នំពេញ៖ សភាពាណិជ្ជកម្មកម្ពុជា កាលពីព្រឹកថ្ងៃទី១២ ខែកញ្ញា ឆ្នាំ២០២៣ បានរៀបចំកិច្ចប្រជុំក្រុមការងារ “ច” “ផ្នែកដឹកជញ្ជូននិងហេដ្ឋារចនាសម្ព័ន្ធ” ផ្នែកឯកជន នៃវេទិការាជរដ្ឋាភិបាល-ផ្នែកឯកជន តាមរយៈការចូលរួមដោយផ្ទាល់ និងតាមប្រព័ន្ធអនឡាញហ្ស៊ូម (ZOOM) ក្រោមវត្តមានលោក ឧកញ៉ា សូ ងួន សហប្រធានក្រុមការងារ “ច” ផ្នែកឯកជន។
កិច្ចប្រជុំនេះក៏មានការចូលរួមផងដែរពីសំណាក់ លោក ឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជា, អនុសហប្រធានក្រុមការងារ “ច” ផ្នែកឯកជន, តំណាងសមាគមធរុកិច្ចជប៉ុនប្រចាំនៅកម្ពុជា, តំណាងសមាគភស្តុភារកម្មកម្ពុជា,តំណាងសមាគមដឹកជញ្ជូនអ្នកដំណើរផ្លូវគោកកម្ពុជា, តំណាងសមាគមដឹកជញ្ជូនទំនិញផ្លូវគោកកម្ពុជា, ក្រុមហ៊ុនផ្នែកឯកជនពាក់ព័ន្ធនឹងឡូជីស្ទីក និងសមាជិកសមាជិកានៃក្រុមការងារផ្នែកឯកជនជាច្រើនទៀតផងដែរ។
ប្រភពសភាពាណិជ្ជកម្មកម្ពុជា បានឱ្យដឹងថា៖គោលបំណងនៃកិច្ចប្រជុំនេះ គឺដើម្បីលើកឡើងនូវវឌ្ឍនភាពនៃការពិគ្រោះពិភាក្សាទៅលើបញ្ហាប្រឈមចាស់របស់ផ្នែកឯកជន ដែលមិនទាន់ទទួលបានការដោះស្រាយនិងបន្តលើកឡើងពិគ្រោះពិភាក្សាទៅលើបញ្ហាប្រឈមថ្មីបន្ថែមទៀតពាក់ព័ន្ធនឹងវិស័យដឹកជញ្ជូន និងហេដ្ឋារចនាសម្ព័ន្ធ ដើម្បីដាក់ស្នើសុំដំណោះស្រាយពីសំណាក់ដៃគូ គឺក្រសួងសាធារណការ និងដឹកជញ្ជូន និងដើម្បីត្រៀមសម្រាប់ទេវិការាជរដ្ឋាភិបាល-ផ្នែកឯកជនលើកទី១៩ នាពេលឆាប់ៗខាងមុខនេះផងដែរ៕