ដោយ: គង់ លាងហួរ
អន្តរជាតិ: ប្រទេសអូម៉ង់បានបង្ហាញផែនការប្រកបដោយមហិច្ឆតា ក្នុងការបង្កើតទីក្រុងឆ្លាតវៃថ្មីមួយ សម្រាប់មនុស្សចំនួន១០០.០០០នាក់ នៅខាងក្រៅរដ្ឋធានី Muscat របស់ខ្លួន។
ទីក្រុងឆ្លាតវៃនេះមានឈ្មោះថា Sultan Haitham និងមានផ្ទៃក្រឡា១៤,៨គីឡូម៉ែត្រការ៉េ ពោលគឺស្មើនឹងទីក្រុង Beverly Hills នៅសហរដ្ឋអាមេរិក ប៉ុន្តែមានអ្នករស់នៅច្រើនជាងទីក្រុង Beverly Hills ជិត៣ដង។
យោងតាមផែនការ ដែលត្រូវបានចែករំលែកទាំងស្រុងជាមួយកាសែត CNN ដោយក្រុមហ៊ុនស្ថាបត្យកម្មអាមេរិក Skidmore, Owings & Merrill (SOM) បានបង្ហាញថា ទីក្រុងនេះ រួមមានផ្ទះចំនួន២០.០០០ខ្នង ក៏ដូចជាសាកលវិទ្យាល័យ សាលារៀន កន្លែងសុខភាព និងវិហារអ៊ីស្លាម។
ទីក្រុងឆ្លាតវៃគ្រោងនឹងសាងសង់នៅលើទីតាំងដែលមិនទាន់បានអភិវឌ្ឍយ៉ាងទូលំទូលាយនៅខេត្ត Al-Seeb ដែលមានចម្ងាយជាច្រើនគីឡូម៉ែត្រភាគខាងលិចរដ្ឋធានី Muscat ។
ការងារសាងសង់គម្រោងនេះគ្រោងនឹងចាប់ផ្តើមនៅឆ្នាំក្រោយ ហើយនឹងត្រូវបញ្ចប់ជា៤ដំណាក់កាល។ ដំណាក់កាលទី១ ដែលដំណើរការរហូតដល់ឆ្នាំ២០៣០ គ្រោងនឹងអភិវឌ្ឍ The City Center ទំហំ៥គីឡូម៉ែត្រការ៉េ និងតំបន់ជិតខាងចំនួន៦ ក្នុងចំណោមតំបន់ចំនួន១៩ដែលបានគ្រោងទុក។
ក្រុមហ៊ុនស្ថាបត្យកម្ម SOM បានបញ្ជាក់នៅក្នុងសេចក្តីប្រកាសព័ត៌មានថា គម្រោងនេះនឹងផ្តល់នូវកន្លែងទីធ្លាសាធារណៈដ៏រស់រវើក លំនៅដ្ឋានដែលមានគុណភាពខ្ពស់ តម្លៃសមរម្យ និងចលភាពក្នុងទីក្រុងឆ្លាតវៃ៕