ដោយៈ គង់ ហ្វីអូណា
ភ្នំពេញៈ ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា លោក ជា ចាន់ដារ៉ា បានលើកឡើងថា ប្រសិនបើកម្ពុជា អាចសម្របសម្រួលដឹកជញ្ជូនទំនិញ ឬកសិផលឆ្លងកាត់ប្រទេសឡាវតាមផ្លូវគោក ឆ្ពោះទៅចិនជោគជ័យ នឹងធ្វើឱ្យវិស័យដឹកជញ្ជូនកម្ពុជា កាន់តែមានដំណើរការល្អ ដឹកជញ្ជូនបានច្រើន និងលឿន ជាពិសេសធ្វើឱ្យចរន្តសេដ្ឋកិច្ច កាន់តែមានភាពរីចម្រើននៅថ្ងៃខាងមុខ។
លោក ជា ចាន់ដារ៉ា បានបន្តថា កន្លងមកកម្ពុជា ដឹកជញ្ជូនទំនិញ ឬកសិផលផ្សេងៗទៅទីផ្សារចិន តាមកំពង់ផែខេត្តព្រះសីហនុ និងតាមផ្លូវគោកច្រកបាវិត ចូលទៅផែកាត់ឡៃ ប្រទេសវៀតណាម និងទៅតាមប្រទេសប្រទេសថៃជាដើម។
លោកមើលឃើញពីចំណុចវិជ្ជមាន នៃគម្រោងបើកច្រកដឹកជញ្ជូនថ្មីនេះដូចជា ទី១ នឹងជួយបើកច្រកសេដ្ឋកិច្ច រវាងប្រទេសឡាវ និងកម្ពុជា លើវិស័យដឹកជញ្ជូននាំចេញនាំចូល រវាងប្រទេសទាំងពីរ និងទី២ ពាក់ព័ន្ធការដឹកជញ្ជូនលក្ខណៈអន្តរជាតិ តាមផ្លូវគោក នឹងចំណាយពេលវេលាតិចជាងមុន ពោលគឺអាចលឿនជាងដឹកតាមផ្លូវទឹក។
លោកជា ចាន់ដារ៉ាបានបញ្ជាក់ទៀតថា ខេត្តមួយចំនួននៃប្រទេសចិន នៅជាប់ព្រំដែនឡាវ គឺពុំមានផ្លូវទឹកនោះទេ ដូច្នេះគឺត្រូវតែដឹកជញ្ជូនតាមផ្លូវគោក ដែលអំណោយផលល្អសម្រាប់កម្ពុជា ដឹកជញ្ជូនទំនិញតាមច្រកនេះ។
លោកបន្តថា ការបើកច្រកដឹកជញ្ជូន ស្មើនឹងបើកច្រកសេដ្ឋកិច្ច នឹងមានលំហូរទំនិញទៅវិញទៅមក និងការនាំចេញទំនិញឆ្លងកាត់ពីប្រទេសមួយទៅប្រទេសមួយទៀត ដែលជួយឱ្យមានចរន្តសេដ្ឋកិច្ចរីកចម្រើន។
អ្នកវិនិយោគិនចិន ដែលមានរោងចក្រនៅកម្ពុជា បានស្នើឱ្យក្រសួង សម្របសម្រួលផ្នែកច្បាប់ ដើម្បីងាកមកដឹកជញ្ជូនកសិផល តាមរយៈប្រទេសឡាវ ទៅកាន់ចិនវិញ ដោយសារការដឹកជញ្ជូនតាមរយៈប្រទេសថៃ និងវៀតណាម មានភាពស្មុគស្មាញ និងថ្លៃចំណាយខ្ពស់។
ក្នុងកិច្ចពិភាក្សារវាងអ្នកវិនិយោគិនចិន និងទីប្រឹក្សាសមាគមស្វាយចន្ទីកម្ពុជា នៅថ្ងៃទី២៤ ខែកក្កដា លោកគង់ វិមាន នាយកខុទ្ទកាល័យ និងអ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងថា កម្ពុជា កំពុងសម្របសម្រួលឱ្យមានការដឹកជញ្ជូនកសិផលដោយឆ្លងកាត់ប្រទេសឡាវ ទៅកាន់ទីផ្សារចិនតាមមធ្យោបាយផ្លូវគោក។
លោកបញ្ជាក់ថា “ការធ្វើបែបនេះ ដើម្បីបន្ធូរបន្ថយការចំណាយលើថ្លៃដឹកជញ្ជូន និងភាពស្មុគស្មាញ ដែលកម្ពុជាធ្លាប់តែពឹងលើថៃ និងវៀតណាម។ សព្វថ្ងៃនេះ កសិផល ដែលនាំចេញទៅចិនតាមច្រកទាំងពីរនេះភាគច្រើនមានដូចជា ស្វាយ, ទុរេន, ស្វាយចន្ទី, ម្នាស់ និងស្រូវអង្ក ជាដើម”។
លោកបានសម្តែងសុទិដ្ឋិនិយមថា ប្រសិនបើដំណើរការផ្លូវពាណិជ្ជកម្មនេះជោគជ័យ ការនាំចេញកសិផលរបស់កម្ពុជាទៅកាន់ទីផ្សារចិន កាន់តែមានភាពងាយស្រួល និងកាត់បន្ថយថ្លៃចំណាយ។
ជាមួយគ្នានេះ កញ្ញា សឿន សុទ្ធនីតា សហស្ថាបនិកសិប្បកម្មកែច្នៃស្វាយចន្ធីស្ទឹងត្រែង បានលើកឡើងថា ការសម្របសម្រួលឱ្យមានការដឹកជញ្ជូន តាមប្រទេសឡាវទៅកាន់ទីផ្សារចិន គឺជារឿងប្រសើរបំផុត ជាពិសេសសម្រាប់ក្រុមហ៊ុនកញ្ញា ដែលមានទីតាំងស្ថិតនៅខេត្តស្ទឹងត្រែងជាប់ព្រំប្រទល់ឡាវស្រាប់៕
