ដោយៈ និស្ស័យ
ភ្នំពេញៈ ទំហំពាណិជ្ជកម្មទ្វេភាគីរវាងកម្ពុជា និងអូស្រ្តាលីសម្រេចបានប្រមាណ២៥៨លានដុល្លារ បើធៀបនឹងឆ្នាំ២០២២ មានទំហំប្រហាក់ប្រហែលគ្នា។ នេះបើយោងតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា។
របាយការណ៍ដដែលបានឱ្យដឹងថា រយៈពេល៦ខែ ចាប់ពីខែ មករា ដល់ខែមិថុនា ឆ្នាំ២០២៣ ការនាំចេញរបស់កម្ពុជា ទៅអូស្រ្តាលី មានតម្លៃជាង១៨០លានដុល្លារ និងការនាំចូលមកវិញមានចំនួនជាង៧៧លានដុល្លារអាមេរិក។
អនុប្រធានសភាពាណិជ្ជកម្មកម្ពុជា អ្នកឧកញ៉ា លឹម ហេងបានលើកឡើងកាលពីខែ ឧសភា ឆ្នាំ ២០២៣ថា អូស្រ្តាលីមានតម្រូវការលើផលិតផលច្រើនប្រភេទ រួមមាន វាយណភណ្ឌ ឧបករណ៍អគ្គិសនី គ្រឿងបង្គុំផ្សេងៗ ជាពិសេសផលិតផលកសិកម្មចំនួន៩ប្រភេទ ដូចជា ផ្លែប័រ ម្ទេស ល្ងរ ដំឡូងជ្វា មៀន ស្វាយ ស្វាយចន្ទី ស្ករត្នោត និងចំណិតចេកក្រៀម ដែលបានសិក្សាដោយកម្មវិធីចង្វាក់តម្លៃ កសិកម្មកម្ពុជា-អូស្ដ្រាលី (CAVAC) ដែលជាឱកាសសម្រាប់ពាណិជ្ជករកម្ពុជានាំចេញទៅអូស្រ្តាលី។ អូស្រ្តាលី ក៏បានចាប់អារម្មណ៍ក្នុងការនាំចេញសម្ភារៈ និងម្ហូបអាហារផ្សេងៗមកកម្ពុជាផងដែរ។
អ្នកឧកញ៉ាលឹម ហេងបានរំពឹងថា ការនាំចេញនាំចូលរវាងប្រទេសទាំងពីរ នឹងកាន់តែមានភាពល្អប្រសើរឡើង។ កម្ពុជា-អូស្រ្តាលី នឹងបង្កើនការធ្វើពាណិជ្ជកម្ម តាមរយៈកិច្ចព្រមព្រៀងRCEP ឱ្យកាន់តែមានប្រសិទ្ធភាព បន្ទាប់ពីកិច្ចព្រមព្រៀងនេះ បានដាក់ឱ្យអនុវត្តអស់រយៈពេលជាង១ឆ្នាំមកនេះ៕
