ដោយ: គង់ លាងហួរ
ប៉េកាំង: សេដ្ឋកិច្ចរបស់ប្រទេសចិន បានកើនឡើងក្នុងល្បឿនយឺតបំផុតក្នុងត្រីមាសទី២ ដោយសន្ទុះទាំងមូល បានធ្លាក់ចុះយ៉ាងឆាប់រហ័ស ដោយសារការធ្លាក់ចុះ នៃតម្រូវការក្នុង និងក្រៅប្រទេស។
ផលិតផលក្នុងស្រុកសរុប (GDP) របស់ប្រទេសចិនបានងើបឡើងត្រឹមតែ០,៨%ប៉ុណ្ណោះ នៅក្នុងត្រីមាសទី២ បើធៀបនឹងត្រីមាសទី១ និងខុសពីការរំពឹងទុករបស់ក្រុមអ្នកវិភាគ នៅក្នុងការស្ទង់មតិរបស់សារពត៌មានReuters ដែលបានព្យាករណ៍ថា សេដ្ឋកិច្ចចិននឹងមានកំណើនក្នុងរង្វង់០,៥ភាគរយ។
ប៉ុន្តែបើផ្អែកលើទិន្នន័យ ពីមួយឆ្នាំទៅមួយឆ្នាំGDP របស់ប្រទេសចិនបានកើនឡើង៦,៣ភាគរយ នៅក្នុងត្រីមាសទីពីរ ដោយបង្កើនល្បឿនពី៤,៥ភាគរយ ក្នុងរយៈពេល៣ខែដំបូង ប៉ុន្តែអត្រានេះគឺទាបជាងការព្យាករណ៍ សម្រាប់កំណើនក្នុងរង្វង់៧,៣ភាគរយ។
យោងតាមទិន្នន័យថ្មីៗនេះ បានបង្ហាញពីការធ្លាក់ចុះយ៉ាងឆាប់រហ័ស ក្រោយការងើបឡើងវិញនៃជំងឺកូវីដ-១៩ របស់ប្រទេសចិន ដោយសារការនាំចេញ បានដាំក្បាលចុះខ្លាំងបំផុត ក្នុងរយៈពេល៣ឆ្នាំជាប់ៗគ្នា។
ការធ្លាក់ចុះនេះ បណ្តាលមកពីការថយចុះ នៃតម្រូវការទាំងក្នុងប្រទេស និងក្រៅប្រទេស និងការដាំក្បាលចុះដ៏យូរ នៃទីផ្សារអចលនទ្រព្យ ដែលបង្កើនការរំពឹងទុកថា អ្នកបង្កើតគោលនយោបាយនឹងត្រូវចាត់វិធានការបន្ថែមទៀត ដើម្បីជំរុញសកម្មភាពសេដ្ឋកិច្ចឡើងវិញ៕
