ដោយ: គង់ លាងហួរ
អន្តរជាតិ: សេដ្ឋកិច្ចពិភពលោក កំពុងបង្ហាញសញ្ញាមិនអាចព្យាករណ៍បាន ដោយសារភាពតានតឹង ផ្នែកភូមិសាស្រ្តនយោបាយ និងសង្រ្គាមត្រជាក់ថ្មី។
លោកស្រី Kristalina Georgieva នាយកគ្រប់គ្រងមូលនិធិរូបិយវត្ថុអន្តរជាតិ (IMF) បានមានប្រសាសន៍ឱ្យដឹងថា ពិភពលោកនឹងសម្រេចបាន កំណើនសេដ្ឋកិច្ចប្រហែល៣ភាគរយ ជារៀងរាល់ឆ្នាំសម្រាប់រយៈពេល៥ឆ្នាំខាងមុខនេះ ពោលគឺទាបជាងអត្រាមធ្យមភាគជាប្រវត្តិសាស្រ្តប្រហែល៣,៨ភាគរយ។
លោកស្រី Georgieva បានថ្លែងក្នុងសុន្ទរកថា បើកវគ្គបណ្តុះបណ្តាលផ្នែកសេដ្ឋកិច្ចរបស់មូលនិធិ IMF ថា រដ្ឋាភិបាលនានា ជាពិសេសនៅក្នុងប្រទេសកំពុងរីកចម្រើន នឹងត្រូវរឹតបន្តឹងគោលនយោបាយសារពើពន្ធរបស់ខ្លួន ដើម្បីរក្សាបំណុលឱ្យស្ថិតក្រោមការគ្រប់គ្រង និងដើម្បីជួយដោះស្រាយអត្រាអតិផរណា។
លោកស្រី Georgievaបានបន្តថា “រដ្ឋាភិបាលរបស់បណ្តាប្រទេសនានា នឹងប្រឈមមុខជាមួយការរឹតបន្តឹង បន្ថែមទៀតនៃលក្ខខណ្ឌហិរញ្ញវត្ថុ ស្របពេលដែលអតិផរណា នៅតែបន្តកើតមាន ហើយវាក៏អាចមានផលប៉ះពាល់ ទៅលើលំហូរមូលធនផងដែរ”។
កាលពីខែមេសាកន្លងទៅIMF បានបន្ទាបទស្សនវិស័យកំណើនសេដ្ឋកិច្ចសកល ប្រចាំឆ្នាំ២០២៣របស់ខ្លួនបន្តិច ខណៈដែលអត្រាការប្រាក់ហក់ឡើងកាន់តែខ្ពស់ បានធ្វើឱ្យសកម្មភាពមានការធ្លាក់ចុះ។
ឥឡូវនេះ IMF បានព្យាករណ៍កំណើនGDP ពិតប្រាកដរបស់ពិភពលោក នៅក្នុងរង្វង់២,៨ភាគរយសម្រាប់ឆ្នាំនេះ និង៣,០ភាគរយសម្រាប់ឆ្នាំ២០២៤ ពោលគឺធ្លាក់ចុះយ៉ាងខ្លាំងពីកំណើន៣,៤ភាគរយ ដែលសម្រេចបានក្នុងឆ្នាំ២០២២ ដោយសារតែគោលនយោបាយរូបិយវត្ថុកាន់តែមានភាពតឹងរ៉ឹង។
មូលនិធិរូបិយវត្ថុអន្តរជាតិ(IMF) គឺជាទីភ្នាក់ងារហិរញ្ញវត្ថុដ៏សំខាន់មួយរបស់អង្គការសហប្រជាជាតិ និងជាស្ថាប័នហិរញ្ញវត្ថុអន្តរជាតិ ដែលមានទីស្នាក់ការកណ្តាលនៅទីក្រុងវ៉ាស៊ីនតោនឌីស៊ី។
មូលនិធិរូបិយវត្ថុអន្តរជាតិ (IMF) ធ្វើការដើម្បីសម្រេចបាននូវកំណើនប្រកបដោយនិរន្តរភាព និងវិបុលភាព សម្រាប់ប្រទេសសមាជិកទាំង១៩០របស់ខ្លួន៕
