ដោយៈ តែម សុខុម
វៀងចន្ទន៍: ក្រុមហ៊ុនចិន China Southern Power Grid (CSG) កំពុងសម្លឹងរកឱកាសបង្កើនការបោះទុន វិនិយោគកាន់តែច្រើននៅក្នុងប្រទេសឡាវ បន្ទាប់ពីខ្លួនបានក្លាយជាអ្នកវិនិយោគថាមពលដ៏សកម្ម និងជាដៃគូពាណិជ្ជកម្មនៅក្នុងប្រទេសនេះ។
យោងតាមកាសែត Vientiane Times បានឱ្យដឹងថា លោក Li Xinhao ដែលជាអ្នកគ្រប់គ្រងទូទៅ ផ្នែកសហប្រតិបត្តិការអន្តរជាតិនៃក្រុមហ៊ុនCSG បាននិយាយកាលពីពេលថ្មីៗនេះថា ក្រុមហ៊ុនដែលគ្រប់គ្រងដោយរដ្ឋចិន មួយនេះ និងបណ្តាប្រទេសជាដៃគូក្នុងតំបន់បានជួយគ្នាទៅវិញទៅមក នៅក្នុងការធ្វើឱ្យការផ្គត់ផ្គង់ ថាមពលមានតុល្យភាព។
នេះគឺដោយសារតែប្រទេសចិន នាំចេញថាមពលក្នុងរដូវប្រាំងនៅអាស៊ីអាគ្នេយ៍ និងនាំចូលក្នុងរដូវវស្សា ជាពេលដែលសមត្ថភាពផលិតអគ្គិសនីកើនឡើង នៅក្នុងបណ្ដាប្រទេសជិតខាង។
លោក Li Xinhao និយាយថា ក្រុមហ៊ុន CSG គ្រោងនឹងសាងសង់ខ្សែបញ្ជូនអគ្គិសនីបន្ថែមទៀត នៅក្នុងប្រទេសឡាវ និងជួយប្រទេសឡាវ ពង្រីកខ្សែបញ្ជូនទៅកាន់បណ្ដាប្រទេសជិតខាង ដើម្បីបង្កើនការតភ្ជាប់ រវាងបណ្ដាប្រទេសទន្លេមេគង្គ-ឡានឆាង នៅពេលអនាគត។
ដោយប្រទេសឡាវ មានសមត្ថភាពខ្ពស់ក្នុងការផលិតវារីអគ្គិសនី សម្រាប់លក់ទៅឱ្យប្រទេសជិតខាង ដោយសារតែខ្លួនសម្បូរស្ទឹង និងទន្លេ ក្រុមហ៊ុន CSG ចាត់ទុកថាវាជាឱកាសដ៏ល្អ សម្រាប់ខ្លួនពង្រីកការវិនិយោគថាមពលរបស់ខ្លួន នៅក្នុងប្រទេសក្រីក្រមួយនេះ។
ផ្លូវដែកល្បឿនលឿនឡាវ-ចិន ក៏ត្រូវបានដំណើរការថាមពលដោយក្រុមហ៊ុនCSG ផងដែរ (រួមជាមួយអគ្គិសនីឡាវ) ដែលបានជួយប្រទេសឡាវ ដំឡើងបង្គោលបញ្ជូនអគ្គិសនី តាមបណ្ដោយផ្លូវដែកនេះ៕ Laotian Times៕
