ដោយៈ គង់ ម៉ាលីនណា
ភ្នំពេញៈ ទឹកប្រាក់នៃការនាំចេញក្នុងឆមាសទី១ ឆ្នាំ ២០២៣ មានជាង១១ពាន់លានដុល្លារ កើនឡើងតិចតួចធៀបឆមាសទី១ ឆ្នាំ ២០២២។ នេះបើតាមស្ថិតិអគ្គនាយកដ្ឋានគយ និងរដ្ឋាករកម្ពុជា។
ទិន្នន័យដែលទើបចេញផ្សាយ កាលពីថ្ងៃទី១០ ខែកក្កដាបានបង្ហាញថា ពីខែមករា ដល់ខែមិថុនា ឆ្នាំ ២០២៣ កម្ពុជាបាននាំចេញទំនិញទៅទីផ្សារអន្តរជាតិ ក្នុងទឹកប្រាក់សរុប១១,៤៦៤,៤៨ លានដុល្លារ កើនឡើង០,៧៥ភាគរយ បើធៀបរយៈពេលដូចគ្នាឆ្នាំ ២០២២ ដែលមានចំនួន១១,៣៧៩,១២២ លានដុល្លារ។
អ្វីដែលធ្វើឱ្យចំនួនទឹកប្រាក់នាំចេញនៅឆមាសទី១ ឆ្នាំ ២០២៣ កើនឡើង គឺដោយសារការនាំចេញរយៈពេល២ខែចុងក្រោយ នេះមានភាពវិជ្ជមាន ដោយខែឧសភា នាំចេញបាន១៩៤៩,៣៥ លានដុល្លារកើន ៧,៩ ភាគរយ និងខែមិថុនា ចំនួន២២៨១ លានដុល្លារ កើន១៦ភាគរយ។
របាយការណ៍ដដែលបានបង្ហាញថា ទំនិញដែលកម្ពុជានាំចូលក្នុងឆមាសទី១ ឆ្នាំ ២០២៣ គឺមានទឹកប្រាក់១២,២២៩,១៨ លានដុល្លារ ធ្លាក់ចុះ២២,៩ភាគរយ បើធៀបនឹងឆមាសទី១ ឆ្នាំ២០២២ ដែលមាន ១៥ ៨៦៤,៧២ លានដុល្លារ។
ផ្អែកតាមតួលេខខាងលើ បានបង្ហាញថា ទំហំពាណិជ្ជកម្មអន្តរជាតិរបស់កម្ពុជាក្នុងឆមាសទី១ ឆ្នាំ ២០២៣ មានទឹកប្រាក់សរុប២៣ ៦៩៣,៦៦ លានដុល្លារ ធ្លាក់ចុះ១៣ ភាគរយ។
សម្រាប់តុល្យភាពជញ្ជីងពាណិជ្ជកម្មអន្តរជាតិ (ចំនួនទឹកប្រាក់នាំចេញ និងនាំចូល) នៅក្នុងឆមាសទី១ ឆ្នាំ ២០២៣ គឺកម្ពុជាមានឱនភាព៧៦៤,៧ លានដុល្លារ ខណៈកាលពីឆមាសទី១ ឆ្នាំ ២០២២ មានរហូតដល់៤ ៤៨៥,៦លានដុល្លារ។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោកបណ្ឌិតហុង វណ្ណៈ បានមានប្រសាសន៍ថា ក្តីបារម្ភពីបញ្ហាជម្លោះភូមិសាស្ត្រនយោបាយរបស់ប្រទេសធំៗ ពិសេសសង្គ្រាមរវាងប្រទេសរុស្សី និងអ៊ុយក្រែន បានធ្វើឱ្យការផ្លាស់ប្តូរពាណិជ្ជកម្ម នៅស្ទើរគ្រប់ប្រទេស ធ្លាក់ចុះ ចាប់តាំងពីពាក់កណ្តាលឆ្នាំ២០២២ រហូតដល់ដើមឆ្នាំ ២០២៣នេះ។
លោកបន្តថា “ទោះយ៉ាងណាបញ្ហាទាំងនោះ ហាក់រលាយវិញខ្លះៗហើយ”។ លោកបន្តថា “កំណើនប្រាក់នាំចេញរបស់កម្ពុជា គឺដោយសារសមត្ថភាពផលិត និងការបញ្ជាទិញកើនឡើង”៕
