ដោយៈ គង់ សូរិយា
ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគចំនួន៨៤គម្រោង ដោយមានទំហំទុនចំនួន៩៤៦,៩៤លានដុល្លារអាមេរិក ដោយបង្កើតឱកាសការងារជូនប្រជាពលរដ្ឋបានចំនួន១១៦,០៧៣កន្លែងគិតត្រឹមឆមាសទី១ឆ្នាំនេះ។
បើធៀបទៅនឹងរយៈពេល៦ខែដូចគ្នា ឆ្នាំ២០២២ ចំនួននេះមានការថយចុះ៣គម្រោង។
ក្រុមប្រឹក្សាអភិវឌ្ឍន៍កម្ពុជា បានបង្ហាញថា ក្នុងចំណោម៨៤ក្រុមហ៊ុន ដែលមានទុនវិនិយោគជិត១០០០លានដុល្លារអាមេរិក ក្នុងនោះ ខែមករាឆ្នាំ២០២៣ មានគម្រោងវិនិយោគចំនួន១០ មានទុនចំនួន៩៩,៤លានដុល្លារអាមេរិក បង្កើតការការជូនប្រជាពលរដ្ឋចំនួន១៧,១២៩កន្លែង។
ខែកម្ភៈ មានគម្រោងវិនិយោគចំនួន១៧ក្រុមហ៊ុន មានទុនវិនិយោគចំនួន៩៨,៨លានដុល្លារអាមេរិក ដោយផ្តល់ឱកាសការងារជូនដល់ប្រជាពលរដ្ឋចំនួន២២,៧៨៤កន្លែង។
ខែមីនា មានគម្រោងវិនិយោគចំនួន៧ ដែលមានទុនវិនិយោគចំនួន៣៣,៧លានដុល្លារអាមេរិក ដោយផ្តល់ឱកាសការងារជូនប្រជាពលរដ្ឋចំនួន៦,៦៦៩កន្លែង។
ខែមេសា មានគម្រោងវិនិយោគចំនួន២០ ក្រុមហ៊ុនមានទុនវិនិយោគចំនួន២៤៧,៧លានដុល្លារអាមេរិក ផ្តល់ឱកាសការងារជូនដល់ប្រជាពលរដ្ឋចំនួន១៧,៧២៣កន្លែង។
ខែឧសភា មានគម្រោងវិនិយោគចំនួន១០ក្រុមហ៊ុន មានទុនវិនិយោគចំនួន៦០,១៤លានដុល្លារ ដោយផ្តល់ឱកាសការងារជូនប្រជាពលរដ្ឋចំនួន១៣៩៨៧កន្លែង និងខែមិថុនាមានគម្រោងវិនិយោគចំនួន៣០ មានទុនវិនិយោគចំនួន៤០៧,៦លានដុល្លារអាមេរិក ដោ យផ្តល់ឱកាសការងារជូន ដល់ប្រជាពលរដ្ឋចំនួន៣៧,៧៨១នាក់។
ក្នុងចំណោមគម្រោងចំនួន៨៤ ដែលមានទំហំទុនជិត ១០០០លានដុល្លារគម្រោ ងដែលបោះទុនច្រើនជាងគេ គឺគម្រោងបង្កើតរោងចក្រផលិតសំបកកង់យានយន្ត នៅក្នុងតំបន់សេដ្ឋកិច្ចពិសេស យូ ប៊ី អ៊ី ស្នួល ខេត្តក្រចេះដែលមានទុនប្រមាណ១៣៨លានដុល្លារ។
បន្ទាប់មកគម្រោងបង្កើតរោងចក្រ ផលិតស៊ីម៉ង់ត៍នៅស្រុករតនមណ្ឌល ខេត្តបាត់ដំបង ដែលមានទំហំទុនវិនិយោគប្រមាណ ៩៥លានដុល្លារ៕
