តែម សុខុម
គូឡាឡាំពួ: មន្ត្រីការទូតចិន បានបញ្ជាក់កាលពីថ្ងៃពុធ ទី២៨ ខែមិថុនា ថា សហរដ្ឋអាមេរិក ត្រូវតែដកចេញនូវទណ្ឌកម្មមកលើប្រទេសចិន ប្រសិនបើរដ្ឋការរបស់ប្រធានាធិបតី ចូ បៃឌិន ចង់ចរចាកម្រិតខ្ពស់រវាងកងកម្លាំងប្រដាប់អាវុធចិន និងអាមេរិក។
លោក Liu Pengyu អ្នកនាំពាក្យស្ថានទូតចិន ប្រចាំក្រុងវ៉ាស៊ីនតោន បានលើកឡើងក្នុងបទសម្ភាសន៍មួយកាលពីថ្ងៃពុធ ថា “ភាគីអាមេរិក ដឹងហើយនូវហេតុផលដែលបង្កការលំបាកក្នុងទំនាក់ទំនងយោធា និងយោធាជាមួយប្រទេសចិន។ ឧបសគ្គបែបនេះត្រូវតែដកចេញ មុនពេលការផ្លាស់ប្តូរ និងកិច្ចសហប្រតិបត្តិការណាមួយអាចធ្វើឡើងទៅបានរវាងប្រទេសទាំងពីរ”។
អ្នកនាំពាក្យរូបនេះមិនបាននិយាយពីទណ្ឌកម្មឱ្យចំៗនោះទេ ប៉ុន្តែការលើកឡើងរបស់លោកទំនងជាសំដៅដល់សំណើរបស់សហរដ្ឋអាមេរិក សុំជួបចរចាជាមួយរដ្ឋមន្ត្រីការពារជាតិចិន លោក Li Shangfu ដែលត្រូវសហរដ្ឋអាមេរិក ដាក់ទណ្ឌកម្មក្នុងឆ្នាំ២០១៨ ចំពោះការទិញសព្វាវុធពីប្រទេសរុស្ស៊ី។
ក្រុមមន្ត្រីចិន ធ្លាប់បានបញ្ជាក់យ៉ាងច្បាស់ទៅកាន់សមភាគីអាមេរិក ថា រដ្ឋមន្ត្រីការពារជាតិចិន លោក Li Shangfu នឹងមិនជួបជាមួយរដ្ឋមន្ត្រីការពារជាតិអាមេរិក លោក Lloyd Austin ជាដាច់ខាត លុះត្រាតែសហរដ្ឋអាមេរិក ដកទណ្ឌកម្មទាំងនោះចេញសិន។
រដ្ឋការរបស់លោក ចូ បៃឌិន បានស្វះស្វែងបង្កើនបណ្តាញទំនាក់ទំនងជាមួយប្រទេសចិន ចាប់តាំងពីរដ្ឋាភិបាលក្រុងប៉េកាំង បានកាត់ផ្តាច់ទំនាក់ទំនងទាំងនេះដើម្បីប្រឆាំងនឹងដំណើរទស្សនកិច្ចរបស់ប្រធានសភាអាមេរិក លោកស្រី Nancy Pelosi ទៅកាន់កោះតៃវ៉ាន់ កាលពីរដូវក្តៅឆ្នាំមុន។
ប្រទេសចិន បានច្រានចោលសំណើរបស់មន្ទីរបញ្ចកោណ សម្រាប់ជំនួបជាមួយលោក Lloyd Austin នៅប្រទេសសិង្ហបុរី ក្នុងខែមិថុនា ខណៈរដ្ឋមន្ត្រីការពារជាតិទាំងពីរចូលរួមសន្និសីទមួយស្ដីពីបញ្ហាសន្តិសុខ៕ The Edge Markets៕
