ដោយ: គង់ លាងហួរ
អន្តរជាតិ: កិច្ចប្រជុំកំពូលអាស៊ានលើកទី៤២ ត្រូវបានរៀបចំឡើងនៅទីក្រុងឡាប៊ូនបាចូ សាធារណរដ្ឋឥណ្ឌូនេស៊ី ដោយបានសង្កត់ធ្ងន់លើភាពសំខាន់នៃការឯកភាពគ្នាក្នុងតំបន់ និង សមាហរណកម្មសេដ្ឋកិច្ច។
លោក Joko Widodo ប្រធានាធិបតីឥណ្ឌូនេស៊ី មានប្រសាសន៍ថា “ជាមួយនឹងការឯកភាពគ្នា អាស៊ាននឹងធ្វើជាអ្នកឈរនៅកណ្តាលក្នុងការពាំនាំសន្តិភាព និង ការអភិវឌ្ឍន៍ ហើយនៅពេលអនាគត អាស៊ាននឹងត្រូវពង្រឹងសមាហរណកម្មសេដ្ឋកិច្ចរបស់ខ្លួន កិច្ចសហប្រតិបត្តិការ រួមទាំងការអនុវត្តភាពជាដៃគូសេដ្ឋកិច្ចគ្រប់ជ្រុងជ្រោយ ពង្រឹងផ្នែកសុខភាព អាហារ ថាមពល ក៏ដូចជាការរក្សាស្ថេរភាពហិរញ្ញវត្ថុផងដែរ”។
កិច្ចប្រជុំកំពូលអាស៊ានលើកទី៤២ ក៏បានបញ្ជាក់នូវការគាំទ្រចំពោះភាពជាប្រធានអាស៊ានរបស់ឥណ្ឌូនេស៊ី ក្រោមមូលបទ “សារៈសំខាន់អាស៊ាន៖ ស្នូលនៃកំណើន និងវឌ្ឍនភាពក្នុងការសម្រេចបាននូវអាទិភាពរបស់អាស៊ានឆ្នាំ២០២៣” ដែលមានគោលដៅពង្រឹងអាស៊ានជាអង្គការមួយដែលមានភាពរឹងមាំ និងសកម្ម”។
ក្នុងជំនួបកំពូលនេះ សម្តេចតេជោ ហ៊ុនសែន នាយករដ្ឋមន្ត្រីនៃកម្ពុជាក៏បានជួបពិភាក្សាទ្វេរភាគីជាមួយសមភាគីវៀតណាម និងទីម័រខាងកើត កាលពីរសៀលថ្ងៃអង្គារសប្តាហ៍នេះផងដែរ។ជាមួយគ្នានេះ លោកប្រធានាធិបតីហ្វីលីពីន Ferdinand Marcos Jr បានអំពាវនាវដល់ប្រទេសសមាជិកអាស៊ានទាំងអស់ឱ្យបង្ហាញពីការប្តេជ្ញាចិត្តចំពោះគោលការណ៍ពាណិជ្ជកម្មសេរី។
លោក Ferdinand Marcos មានប្រសាសន៍ថា “អាស៊ានគួរតែបង្ហាញពីការប្តេជ្ញាចិត្តរបស់ខ្លួនចំពោះគោលការណ៍ពាណិជ្ជកម្មសេរី និងប្រព័ន្ធពាណិជ្ជកម្មពហុភាគី”។ លោកមានប្រសាសន៍បន្តថា “ពួកយើងមានសុទិដ្ឋិនិយមថា កិច្ចព្រមព្រៀង RECP និងធ្វើឲ្យកំណើនសេដ្ឋកិច្ចលូតលាស់ដែលនឹងជួយកសាងភាពធន់ និងការផ្គត់ផ្គង់សង្វាក់ផលិតកម្ម ដើម្បីគាំទ្រម៉ាក្រូ និងគ្រឹះស្ថានខ្នាតតូចចូលទៅក្នុងសេដ្ឋកិច្ចពិភពលោក”។
នាយករដ្ឋមន្ត្រីសិង្ហបុរីលោក Lee Hsien Loong ក៏បានចង្អុលបង្ហាញពីសារៈសំខាន់នៃសមាហរណកម្មសេដ្ឋកិច្ចសម្រាប់សមាជិកអាស៊ានផងដែរ។ លោក Lee បានមានប្រសាសន៍ “អាស៊ានត្រូវការពង្រីកកិច្ចព្រមព្រៀងស្នូលបន្ថែមទៀតដូចជា ពាណិជ្ជកម្មអាស៊ានក្នុងកិច្ចព្រមព្រៀងទំនិញ”។
លោក Lee Hsien Loong បន្តថា “ពួកយើងអាចទទួលបានផលចំណេញសេដ្ឋកិច្ចយ៉ាងខ្លាំងពីការធ្វើឱ្យប្រសើរឡើងនូវការតភ្ជាប់ឌីជីថល និងអក្ខរកម្មរបស់ប្រជាជនរបស់យើង”។
ក្រុមមេដឹកនាំអាស៊ាន ក៏បានអះអាងជាថ្មី នូវការប្តេជ្ញាចំពោះការអនុវត្តយ៉ាងពេញលេញ និងប្រកបដោយប្រសិទ្ធភាព នៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ ក្នុងគ្រប់ទិដ្ឋភាព ព្រមទាំងការបង្កើតលេខាធិការដ្ឋានដើម្បីពង្រឹងសង្វាក់ផ្គត់ផ្គង់ក្នុងតំបន់ និងរួមចំណែកដល់របៀបវារៈសមាហរណកម្មសេដ្ឋកិច្ចអាស៊ាន ក៏ដូចជារក្សានូវមជ្ឈភាពអាស៊ានផងដែរ។
លើសពីនេះអាស៊ានក៏បានប្តេជ្ញាធ្វើឱ្យខ្លួនក្លាយជាចំណុចស្នូលនៃកំណើនសេដ្ឋកិច្ច តាមរយៈការបង្កើនការវិនិយោគក្នុងការអភិវឌ្ឍធនធានមនុស្ស ឱ្យកាន់តែមានភាពប្រកួតប្រជែង និងមុតស្រួច ដើម្បីឆ្ពោះទៅរកអនាគតនៃការងារ និងត្រៀមខ្លួនរួចជាស្រេចចំពោះការវិវឌ្ឍឌីជីថលដ៏លឿនរហ័ស៕
