ដោយ: គង់ លាងហួរ
ភ្នំពេញ: សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានស្នើឱ្យប្រទេសឡាវ សហការគ្នាជាមួយកម្ពុជា ដើម្បីពិនិត្យលើការរៀបចំកិច្ចព្រមព្រៀង មិនយកពន្ធត្រួតគ្នា ដើម្បីធ្វើយ៉ាងណាជំរុញការវិនិយោគរវាងប្រទេសទាំងពីរ ឱ្យបានកាន់តែច្រើនឡើងបន្ថែមទៀត។
សំណើរនេះបានធ្វើឡើង នៅក្នុងឱកាសជំនួបពិភាក្សាការងាររវាងសម្ដេចតេជោ ហ៊ុន សែន ជាមួយលោក ថងលុន ស៊ីសុលីត (Thongloun Sisoulith) ប្រធានរដ្ឋនៃសាធារណរដ្ឋប្រជាធិបតេយ្យប្រជាមានិតឡាវ ដែលបានដឹកនាំគណៈប្រតិភូ អញ្ជើញមកបំពេញទស្សនកិច្ចផ្លូវរដ្ឋ និងចូលរួមពិធីបើកព្រឹត្តិការណ៍ស៊ីហ្គេម លើកទី៣២ នៅកម្ពុជា។
ទន្ទឹមនឹងនោះ សម្ដេចតេជោបានឯកភាពជាមួយលោក ថងលុន ស៊ីសុលីត លើទំនាក់ទំនងរវាងប្រទេសទាំងពីរ និងអ្វីដែលត្រូវធ្វើបន្ត។ លើសពីនេះ សម្ដេចតេជោក៏បានថ្លែងអំណរគុណ ជូនចំពោះលោកថងលុន ដែលបានអញ្ជើញមកចូលរួមពិធី បើកកីឡាស៊ីហ្គេមនៅកម្ពុជាផងដែរ។
ថ្លែងក្នុងជំនួបនេះ លោក ថងលុន បានគោរពថ្លែងអំណរគុណជូនចំពោះសម្ដេចតេជោ និងជូនចំពោះកម្ពុជា ដែលបានជួយដល់ប្រទេសឡាវយ៉ាងធំធេង និងដ៏ថ្លៃថ្នូរនាពេលកន្លងមក រួមទាំងការជួយលើវិស័យសុខាភិបាល និងវិស័យសេដ្ឋកិច្ច។
លោក ថងលុន បានលើកឡើងថា ទំនាក់ទំនងរវាងកម្ពុជា និងឡាវ កំពុងតែស្ថិតដល់ចំណុចកំពូលមួយ ហើយអ្វីដែលត្រូវធ្វើបន្ត គឺរួមគ្នាសម្របសម្រួលគ្នា ដើម្បីធ្វើឲ្យទំនាក់ទំនងនេះ ឈានឆ្ពោះឡើងទៅមួយកម្រិតទៀត តាមរយៈការរួមគ្នាអនុវត្តnន៍ តាមកិច្ចព្រមព្រៀងដែលមានស្រាប់ និងស្វែងរកកិច្ចសហប្រតិបត្តិការ ផ្សេងបន្ថែមទៀត ដូចជាលើវិស័យទេសចរណ៍ វិស័យវិនិយោគ វិស័យសន្តិសុខ និងរួមគ្នាត្រៀមដោះស្រាយគ្រោះមហន្តរាយ ដែលអាចកើតឡើងជាយថាហេតុនានា ៕