ដោយៈ សុខុម
បាងកក: ប្រទេសថៃបានសាងសង់ ឬពង្រីករោងចក្រសរុបចំនួន១.២១១រោងចក្រអំឡុងឆមាសទី១ ដើមឆ្នាំសារពើពន្ធ២០២៣ ដោយបង្កើតការងារបានជាង៣០.០០០កន្លែង។ នេះបើយោងតាមកាសែត Bangkok Post ចុះផ្សាយកាលពីថ្ងៃពុធ ទី៣ ខែឧសភា។
លោក Anucha Nakasai រដ្ឋមន្ត្រីឧស្សាហកម្មស្ដីទីបានលើកឡើងថា មួយផ្នែកនៃការវិនិយោគនេះ អំឡុងពេលខែតុលា ឆ្នាំ២០២២ ដល់ខែមីនា ឆ្នាំ២០២៣ បានមកពីសហគ្រិន ក្នុងឧស្សាហកម្មជីវប្លាស្ទិក (Bioplastic) និងឧស្សាហកម្មរថយន្តអគ្គិសនី (EV) ស្របតាមគោលនយោបាយរបស់រដ្ឋាភិបាល ដើម្បីលើកកម្ពស់សេដ្ឋកិច្ចបៃតង និងរថយន្តដែលមិនបង្កផលប៉ះពាល់ដល់បរិស្ថាន។
លោកបន្ថែមទៀតថា “រដ្ឋាភិបាលបានចាប់ផ្ដើមកម្មវិធី កាត់បន្ថយពន្ធក្រុមហ៊ុន ដើម្បីជំរុញការវិនិយោគផ្នែកផលិតកម្មជីវប្លាស្ទិក”។ការវិនិយោគក្នុងវិស័យជីវប្លាស្ទិក បានឈានដល់៥៥៩លានដុល្លារអាមេរិក។
ក្រសួងឧស្សាហកម្ម និងក្រសួងហិរញ្ញវត្ថុបាន និងកំពុងធ្វើការរួមគ្នា ដើម្បីលើកកម្ពស់ការផលិតបន្ថែមទៀត នូវប្លាស្ទិកដែលងាយរលាយនៅក្នុងប្រទេសថៃ។ កិច្ចប្រឹងប្រែងរបស់ក្រសួងទាំងពីរនេះមានគោលបំណងកាត់បន្ថយសំណល់ប្លាស្ទិក ដែលបង្កផលប៉ះពាល់ខ្លាំងដល់បរិស្ថាន។
សមាគមឧស្សាហកម្មជីវប្លាស្ទិកថៃ (Thai Bioplastics Industry Association) បានអះអាងកាលពីដើមឆ្នាំនេះថា ថៃ ជាប្រទេសផលិត នូវផលិតផលជីវប្លាស្ទិកធំបំផុតទី២ ក្នុងពិភពលោក ដើម្បីបំពេញនូវតម្រូវការកើនឡើងនៅបរទេស។
ផលិតកម្មជីវប្លាស្ទិក មិនត្រឹមតែបន្ថែមតម្លៃ ទៅលើផលិតផលកសិកម្មរបស់ថៃប៉ុណ្ណោះទេ ប៉ុន្តែវាក៏ជាការជួយគាំទ្រដល់កិច្ចប្រឹងប្រែងរបស់ពិភពលោក ដើម្បីកាត់បន្ថយការបំភាយឧស្ម័នកាបូនិកទៅលើបរិយាកាសផងដែរ និងជាជម្រើសមួយ សម្រាប់ដោះស្រាយបញ្ហាដែលបង្កឡើងដោយការប្រើប្រាស់ប្លាស្ទិក៕ Bangkok Post៕
