ដោយ: គង់ លាងហួរ
ហ្សាការតា: នាពេលថ្មីៗនេះ លំហូរវិនិយោគផ្ទាល់ពីបរទេស (FDI)ចូលប្រទេសឥណ្ឌូនេស៊ី បានហក់ឡើងដល់២០,២% នៅក្នុងត្រីមាសទី១ ឆ្នាំ២០២៣នេះ ខណ:លំហូរនេះត្រូវបានជំរុញយ៉ាងខ្លាំង ដោយឧស្សាហកម្មដែក ចំពេលមានកិច្ចខិតខំប្រឹងប្រែង របស់រដ្ឋាភិបាល ជុំវិញការជំរុញទៅលើការវិនិយោគលើវិស័យរ៉ែ។
យោងតាមទិន្នន័យដែលទទួលបាន ពីក្រសួងវិនិយោគរបស់ប្រទេសឥណ្ឌូនេស៊ី បានបង្ហាញឱ្យដឹងថា គិតត្រឹមត្រីមាសទី១ ឆ្នាំនេះ លំហូរ FDI ដែលមិនរាប់បញ្ចូលការវិនិយោគ ក្នុងវិស័យធនាគារ ប្រេង និងឧស្ម័ន មានតម្លៃ១៧៧ទ្រីលានរីងហ្គីត (១១,៩៦ពាន់លានដុល្លារ) ពោលគឺបានកើនឡើង៤៣,៣% បើធៀបនឹងត្រីមាសចុងក្រោយ ក្នុងឆ្នាំ២០២២ ។
លើសពីនេះ រដ្ឋមន្រ្តីក្រសួងវិនិយោគ លោក Bahlil Lahadalia បានមានប្រសាសន៍ថា លំហូរវិនិយោគផ្ទាល់ពីបរទេស ចូលក្នុងវិស័យផលិតកម្ម ជាពិសេសទៅលើឧស្សាហកម្មលោហ:ធាតុ នៅត្រីមាសទី១នេះ បានជាប់ចំណាត់ថ្នាក់លើគេ ដែលវាបានបង្ហាញយ៉ាងច្បាស់ពីផលវិជ្ជមាន ចំពោះគោលនយោបាយរបស់រដ្ឋាភិបាល ក្នុងការផ្តល់តម្លៃបន្ថែម ទៅកាន់ធនធានធម្មជាតិ ដែលមាននៅក្នុងប្រទេស ។
មិនតែប៉ុណ្ណោះ យោងតាមទិន្នន័យរបស់ក្រសួងខាងលើ បានបង្ហាញឱ្យដឹងទៀតថា ប្រទេសសិង្ហបុរី ហុងកុង និងប្រទេសចិន គឺជាប្រភពធំបំផុតសម្រាប់លំហូរ FDI ចូលប្រទេសឥណ្ឌូនេស៊ី នៅក្នុងត្រីមាសទី១នេះ ដោយសិង្ហបុរី បានវិនិយោគក្នុងទឹកប្រាក់៤,៣ពាន់លានដុល្លារ ហុងកុងវិនិយោគ១,៥ពាន់លានដុល្លារ និងចិនបានបោះទុនវិនិយោគ១,២ពាន់លានដុល្លារ៕
