ដោយៈ សុខុម
ថៃង្វៀន: ខេត្តថៃង្វៀន (Thai Nguyen) នៃប្រទេសវៀតណាម គ្រោងសាងសង់តំបន់ឧស្សាហកម្ម (Industrial Zones) និងតំបន់ប្រមូលផ្តុំឧស្សាហកម្ម (Industrial Clusters) ថ្មីៗចំនួន១៦បន្ថែមទៀតចាប់ពីពេលនេះរហូតដល់ឆ្នាំ២០៣០។
ខេត្តដែលគេស្គាល់ថា ជារដ្ឋធានីតែរបស់វៀតណាម នេះមានគោលបំណង លើកកម្ពស់ការវិនិយោគផ្នែកសំណង់ និងហេដ្ឋារចនាសម្ព័ន្ធតំបន់ឧស្សាហកម្ម និងតំបន់ប្រមូលផ្តុំឧស្សាហកម្ម ឱ្យស្របតាមផែនការមេរបស់ខេត្តថៃង្វៀន សម្រាប់ឆ្នាំ២០២១-២០៣០ ដែលត្រូវបានអនុម័តដោយនាយករដ្ឋមន្ត្រី។ នេះបើយោងតាមសារព័ត៌មាន Vietnam News ចុះផ្សាយនៅថ្ងៃច័ន្ទ ទី០១ ខែឧសភា នេះ។
តំបន់ឧស្សាហកម្មមួយ ដែលត្រូវបានស្នើឡើងថ្មីៗនេះ នឹងគ្របដណ្តប់លើផ្ទៃដី១.៥៩៩ហិកតា នាំឱ្យតំបន់ឧស្សាហកម្មសរុបនៅក្នុងផែនការកើនឡើង រហូតដល់៤.២៤៥ហិកតា ដែលមានទំហំធំជាងជិត៣ដង បើធៀបនឹងទំហំសួនឧស្សាហកម្មចាស់ៗ។
ក្រោមផែនការមេ ខេត្តថៃង្វៀន មានគោលបំណងអភិវឌ្ឍ និងពង្រីកសួនឧស្សាហកម្មចំនួន១១ និងឧទ្យានបច្ចេកវិទ្យាព័ត៌មានប្រមូលផ្តុំ (Concentrated Information Technology Park) មួយនៅឆ្នាំ២០៣០។
សួនឧស្សាហកម្មចំនួន៤ ដែលបានស្នើឡើងថ្មីៗនេះ រួមមានសួនឧស្សាហកម្ម Yen Binh 2 សួនឧស្សាហកម្ម Yen Binh 3 សួនឧស្សាហកម្ម Thuong Dinh និងសួនឧស្សាហកម្ម Tay (West) Pho Yen នៅក្នុងទីក្រុង Pho Yen City ដោយក្នុងនោះសួនឧស្សាហកម្ម Tay (West) Pho Yen គ្របដណ្ដប់លើផ្ទៃដីធំជាងគេ រហូតដល់ទៅ១.១២៨ហិកតា។
តំបន់ឧស្សាហកម្មទាំងនេះ នឹងស្ថិតនៅតាមប្រព័ន្ធផ្លូវសំខាន់ៗតភ្ជាប់ទីក្រុងហាណូយ និងតំបន់ Thai Nguyen-Bac Giang-Vinh Phuc ដែលធ្វើឱ្យដែនដីទាំងនេះ ក្លាយជាទីតាំងដ៏ល្អសម្រាប់ការវិនិយោគបច្ចេកវិទ្យាជាន់ខ្ពស់ និងបៃតង។
ជាងនេះទៅទៀត ខេត្តថៃង្វៀន មានគោលបំណងអភិវឌ្ឍតំបន់ប្រមូលផ្តុំឧស្សាហកម្មចំនួន៤១ លើផ្ទៃដី២.០៦៧ហិកតានៅឆ្នាំ២០៣០ និងតំបន់ប្រមូលផ្តុំឧស្សាហកម្មថ្មីៗ ចំនួន១២បន្ថែមទៀតដែលមានទីតាំងនៅទីក្រុងថៃង្វៀន ទីក្រុង Song Cong និងស្រុកផ្សេងៗទៀត៕ Vietnam News៕
