ដោយ: គង់ លាងហួរ
អន្តរជាតិ: ធនាគារពិភពលោកបានព្យាករណ៍ថា តម្លៃអង្ករអន្តរជាតិនឹងកើនឡើងដល់១៧ភាគរយ បើធៀបនឹងឆ្នាំមុនដល់៥១០ ដុល្លារក្នុងមួយតោនក្នុងឆ្នាំ២០២៣នេះ មុនពេលធ្លាក់ចុះមកត្រឹម៤៩០ដុល្លារវិញក្នុងមួយតោននៅឆ្នាំក្រោយ។
យោងតាមអត្ថបទទស្សនវិស័យទីផ្សារទំនិញប្រចាំឆ្នាំរបស់ខ្លួនដែលបានចេញផ្សាយនៅទីក្រុងវ៉ាស៊ីនតោនកាលពីពេលថ្មីៗនេះបានឱ្យដឹងថា ធនាគារពិភពលោកបានអះអាងថា តម្លៃអង្ករបានកើនឡើង១១ភាគរយនៅក្នុងត្រីមាសទី១ នៃឆ្នាំនេះដោយសារតម្រូវការខ្ពស់ និងការធ្លាក់ចុះនៃការផ្គត់ផ្គង់។
ធនាគារបានលើកឡើងទៀតថា តម្រូវកាដ៏ខ្លាំងបានបណ្តាលមកពី “ពិធីបុណ្យសំខាន់ៗ និងការស្តុកទុកនៅតំបន់អាស៊ីរួមជាមួយនឹងការហក់ឡើងថ្លៃនៃរូបិយប័ណ្ណធៀបនឹងប្រាក់ដុល្លារអាមេរិកនៅក្នុងប្រទេសឥណ្ឌា ថៃ និងវៀតណាម”។
ការធ្លាក់ចុះនៃការផ្គត់ផ្គង់កំពុងប៉ះពាល់ដល់បណ្តាប្រទេសផលិតអង្ករភាគច្រើននៅតំបន់អាស៊ី រួមទាំងប្រទេសចិន ឥណ្ឌា មីយ៉ាន់ម៉ា ថៃ និងវៀតណាមផងដែរ។
ធនាគារនេះបានអះអាងទៀតថា កត្តាមួយទៀតគឺ “ការប្រមូលផលបានទាប និងទឹកជំនន់ក្នុងប្រទេសប៉ាគីស្ថានក្នុងខែកញ្ញាឆ្នាំមុន”។
តម្លៃអង្ករអន្តរជាតិ ដោយផ្អែកលើតម្លៃអង្ករគ្រាប់វែង (ខូច ៥ ភាគរយ) នៅប្រទេសថៃ ជាមធ្យមមានតម្លៃ ៤៣៧ដុល្លារក្នុងមួយតោនកាលពីឆ្នាំមុន ធ្លាក់ចុះពី៤៥៨ ដុល្លារក្នុងមួយតោននៅឆ្នាំ២០២១ និង៤៩៧ដុល្លារក្នុងមួយតោននៅឆ្នាំ២០២០។
កត្តាជាច្រើនបានរួមចំណែកដល់ការកើនឡើងតម្លៃអង្ករ១១ភាគរយនៅក្នុងត្រីមាសទី១ ដូចជា តម្រូវការខ្ពស់បណ្តាលមកពីពិធីបុណ្យធំៗ និងការស្តុកទុកឡើងវិញនៅតំបន់អាស៊ី និងការហក់ឡើងថ្លៃនៃរូបិយប័ណ្ណធៀបនឹងប្រាក់ដុល្លារអាមេរិកនៅក្នុងប្រទេសឥណ្ឌា៕