ដោយ: គង់ លាងហួរ
បាងកក: ធនាគារកណ្តាលថៃ កំពុងពិភាក្សាជាមួយធនាគារកណ្តាលចិន លើការគាំទ្រការប្រើប្រាស់ការទូទាត់ ប្រាក់យ័ន-បាត ដើម្បីកាត់បន្ថយហានិភ័យ នៃការផ្លាស់ប្តូររូបិយប័ណ្ណបរទេស ចំពេលតម្លៃប្រាក់ដុល្លារអាមេរិកកំពុងបន្តប្រែប្រួល។
យោងតាមលោក Sethaput Suthiwartnaruput ទេសាភិបាលធនាគារកណ្តាលថៃ បានឱ្យដឹងថា ធនាគារកណ្តាលថៃ និងធនាគារប្រជាជនចិន បានជួបពិភាក្សាគ្នា លើកិច្ចសហប្រតិបត្តិការបន្ថែម ដើម្បីលើកទឹកចិត្តឱ្យអាជីវកម្ម ប្រើប្រាស់ការទូទាត់ប្រាក់យ័ន-បាតសម្រាប់ពាណិជ្ជកម្មរវាងប្រទេសទាំងពីរ។
ធនាគារកណ្តាលថៃ គ្រោងជួបសមភាគីចិននៅខែក្រោយនេះដើម្បីនិយាយអំពីបញ្ហានេះ។
នៅឆ្នាំ២០២១ ធនាគារកណ្តាលនៃប្រទេសទាំងពីរ បានបន្តកិច្ចព្រមព្រៀងប្តូររូបិយប័ណ្ណទ្វេរភាគី (BSA) របស់ខ្លួនឡើងវិញក្នុងគោលបំណងជំរុញពាណិជ្ជកម្ម និងការវិនិយោគក្នុងរូបិយប័ណ្ណ ក្នុងស្រុក និងពង្រឹងកិច្ចសហប្រតិបត្តិការហិរញ្ញវត្ថុ រវាងប្រទេសទាំងពីរ។
ក្រោមក្របខណ្ឌ នៃការទូទាត់រូបិយប័ណ្ណក្នុងស្រុក ធនាគារកណ្តាលថៃ ក៏បានសហការជាមួយក្រសួងហិរញ្ញវត្ថុ របស់ប្រទេសជប៉ុន ធនាគារ Negara Malaysia និងធនាគារឥណ្ឌូនេស៊ី ដើម្បីគាំទ្រការប្រើប្រាស់រូបិយប័ណ្ណ ក្នុងតំបន់សម្រាប់ពាណិជ្ជកម្ម និងការវិនិយោគក្នុងតំបន់អាស៊ី ក៏ដូចជាការទូទាត់របស់បុគ្គលផងដែរ។
លោក Sethaput បានមានប្រសាសន៍ថា “ថ្មីៗនេះ តម្លៃប្រាក់បាតបាន និងកំពុងមានការប្រែប្រួល ធៀបនឹងប្រាក់ដុល្លារអាមេរិក ដោយសារតែទិសដៅ គោលនយោបាយរូបិយវត្ថុ របស់ធនាគារកណ្តាលអាមេរិក Federal Reserve។
លោកបានបន្តថា “ទោះបីជាការប្រែប្រួលប្រាក់បាត មានកម្រិតខ្ពស់ជាងរូបិយប័ណ្ណក្នុងតំបន់ ដោយផ្អែកលើកត្តាខាងក្រៅក៏ដោយ ប៉ុន្តែកម្រិតរបស់វានៅមានកម្រិតមធ្យម បើធៀបនឹងរូបិយប័ណ្ណផ្សេងទៀត”។
លោក Sethaput បានបន្ថែមទៀតថា “ការប្រែប្រួលនេះ ត្រូវបានគេរំពឹងថា នឹងអាចបន្តកើតមាន ចំពេលដែលមានភាពមិនប្រាកដប្រជាជាសកលនៅលើពិភពលោក”៕