ដោយ: គង់ លាងហួរ
សេអ៊ូល: សេដ្ឋកិច្ចកូរ៉េខាងត្បូង បានកើនឡើង០,៣% នៅក្នុងត្រីមាសទី១ ធៀបនឹងរយៈពេល៣ខែមុននេះ ដោយសារការកើនឡើងនៃការចំណាយឯកជន ដែលបានជួយសេដ្ឋកិច្ចពឹងផ្អែកលើពាណិជ្ជកម្មរួចផុត ពីវិបត្តិសេដ្ឋកិច្ចចំពេល មានការធ្លាក់ចុះនៃការនាំចេញ។
ដោយត្រូវបានប្រកាស នៅក្នុងទិន្នន័យបឋមរបស់ធនាគារកណ្តាលកូរ៉េ (BOK’s) នៅថ្ងៃអង្គារនេះ កំណើនសេដ្ឋកិច្ចប្រចាំត្រីមាសថ្មីបំផុតនេះកើតឡើង បន្ទាប់ពីសេដ្ឋកិច្ចកូរ៉េ បានធ្លាក់ចុះ០,៤ភាគរយពីមួយត្រីមាសទៅមួយត្រីមាស ក្នុងអំឡុងខែតុលាដល់ខែធ្នូ ឆ្នាំ២០២២។
ការធ្លាក់ចុះនៃសេដ្ឋកិច្ច បានជំរុញឱ្យមានការព្រួយបារម្ភថា ប្រទេសនេះ អាចធ្លាក់ចូលក្នុងវិបត្តិសេដ្ឋកិច្ច ការធ្លាក់ចុះផលិតផលក្នុងស្រុកសរុប (GDP) ក្នុងរយៈពេលពីរត្រីមាសជាប់ៗគ្នា ខណៈទាំងការនាំចេញ និងការចំណាយឯកជនជួបការលំបាក។
ការនាំចេញ និងការចំណាយឯកជន គឺជាកត្តាជំរុញដ៏សំខាន់ចំនួនពីរនៃ GDP របស់ប្រទេសកូរ៉េខាងត្បូង។ ការប្រើប្រាស់ក្នុងស្រុកបានកើនឡើង០,៥ភាគរយ នៅក្នុងរយៈពេល៣ខែដំបូងនៃឆ្នាំ២០២៣នេះ។
ការកើនឡើងនេះត្រូវបានគាំទ្រ ដោយការដកចេញនូវបទប្បញ្ញត្តិការឃ្លាតឆ្ងាយពីសង្គម ដែលបានជំរុញឱ្យមានសកម្មភាពលើតម្រូវការហក់ឡើង សម្រាប់ការធ្វើដំណើរទៅក្រៅប្រទេស សកម្មភា ពកម្សាន្ត និងវិស័យសេវាកម្ម។
ក្រុមអ្នកជំនាញបានអះអាងថា ប្រទេសកូរ៉េអាចនឹងបន្តជៀសផុតពីវិបត្តិសេដ្ឋកិច្ច ប៉ុន្តែពួកគេបានគូសបញ្ជាក់ថា ប្រទេសនេះនៅតែប្រឈមមុខនឹងភាពតានតឹង ដែលបណ្តាលមកពីការធ្លាក់ចុះ នៃការនាំចេញ៕
