ដោយ: គង់ លាងហួរ
ភ្នំពេញ: សាជីវកម្មធានាឥណទានកម្ពុជា (CGCC) បានផ្តល់ការធានាឥណទានចំនួន១១៣,៦លានដុល្លារ ដល់អាជីវកម្មជាទុនបង្វិលរបស់ពួកគេ សម្រាប់ការពង្រីកនៅក្នុងត្រីមាសទីមួយ នៃឆ្នាំ២០២៣នេះ។
CGCC បានឱ្យដឹងនៅក្នុងរបាយការណ៍មួយថា នៅចុងត្រីមាសទី១ ខ្លួនបានគាំទ្រអាជីវកម្មជិត១.៣០០ ដោយផ្តល់ការធានាឥណទានសម្រាប់កម្មវិធីប្រាក់កម្ចីរបស់ពួកគេ ដែលមានទំហំទឹកប្រាក់ចំនួន១១៣,៦លានដុល្លារ។
របាយការណ៍ដដែលបានលើកឡើងថា ផ្នែកធំនៃការធានាប្រាក់កម្ចីត្រូវបានប្រើជាដើមទុនបង្វិល និងគោលបំណងផ្សេងទៀតនៃការវិនិយោគ ឬការពង្រីកអាជីវកម្ម និងការចំណាយមូលធន។
គម្រោងការធានាឥណទានផ្សេងៗ បានដើរតួនាទីយ៉ាងសំខាន់ក្នុងការពង្រឹងភាពជាសហគ្រិន និងបង្កើនការរួមបញ្ចូលផ្នែកហិរញ្ញវត្ថុនៅក្នុងប្រទេសកម្ពុជា ជាពិសេសក្នុងអំឡុងពេលជំងឺរាតត្បាត តាមរយៈការផ្តល់ប្រាក់កម្ចីដោយរលូន។
សម្រាប់សហគ្រាសធុនតូច និងមធ្យម វាជួយធ្វើអោយប្រសើរឡើងនូវការដាក់បញ្ចូលហិរញ្ញវត្ថុ។ វាអាចឱ្យពួកគេខ្ចីដោយមិនមានបន្ទុកក្នុងការផ្តល់វត្ថុបញ្ចាំ នៅពេលណាដែលសមត្ថភាព អាជីវកម្មរបស់ពួកគេកើនឡើង។
CGCC បានបង្កើតគម្រោងការធានាចំនួន៣ មកទល់ពេលនេះ រួមមាន គម្រោងធានាការស្ដារអាជីវកម្ម (BRGS) ដែលបានចាប់ផ្តើមនៅខែមីនា ឆ្នាំ២០២២ គម្រោងការធានាសហហិរញ្ញប្បទាន (CFGS) បានបង្ហាញនៅក្នុងខែកញ្ញា ឆ្នាំ២០២១ និងគម្រោងធានាសហគ្រិនស្ត្រី ដែលត្រូវបានដាក់ឱ្យដំណើរការ ក្នុងខែមេសា ឆ្នាំ២០២២៕
