ដោយៈ ម៉ាលីនណា
ភ្នំពេញៈ សករាជនៃរថយន្តប្រើប្រេងសាំង បានឈានទៅជិតបញ្ចប់ហើយ នៅប្រទេសចិន ខណៈក្រុមហ៊ុនផលិតរថយន្តច្រើនឡើងៗ ងាកទៅផលិតរថយន្តដើរដោយថាមពលអគ្គិសនី។
ក្រុមហ៊ុនផលិតរថយន្តចិន នឹងដើរលឿនជាងក្រុមហ៊ុនប្រទេសផ្សេងទៀតនៅបស្ចិមប្រទេស។ នេះបើតាមការវិភាគរបស់អ្នកជំនាញឧស្សាហកម្មរថយន្ត នៅក្នុងឱកាសដែលរដ្ឋាភិបាលចិន រៀបចំពិព័រណ៍រថយន្ត នៅក្រុងសៀងហៃ។
នៅទីក្រុងសៀងហៃ ជាទីដែលចិន រៀបចំពិព័រណ៍រថយន្ត២ឆ្នាំធ្វើម្តង។ ឆ្នាំនេះ ចិនមានរថយន្ត៩៤ម៉ាក និង៣០០ម៉ូដែល។
លោកMike Johnstone អ្នកតំណាងរថយន្តអង់គ្លេស Lotusមានប្រសាសន៍ប្រាប់ ភ្នាក់ងារព័ត៌មានបារាំង AFP ថា អនាគត ចាប់ផ្តើមពីទីនេះឥលូវនេះ ក្រុងសៀងហៃនេះហើយ ដែលនឹងកែប្រែទីផ្សាររថយន្តពិភពលោក។
សហព័ន្ធផលិតរថយន្តចិនឲ្យដឹងថា ក្នុងឆ្នាំ២០២២ ការលក់រថយន្តដើរដោយចរន្តថាមពលអគ្គិសនី គឺលក់ដាច់ទ្វេដង។ ក្នុងមួយឆ្នាំនេះ គេព្យាករទៀតថា ចិនមានរថយន្តដើរ ដោយថាមពលអគ្គិសនី ចំនួនប្រមាណ៤០% នៅទីផ្សាររថយន្តប្រភេទនេះ នៅលើពិភពលោក។
មូលហេតុនេះក៏ព្រោះតែ ជាង២០ឆ្នាំហើយ ដែលប្រទេសចិន រៀបចំផែនការដើម្បីគោលដៅនព។ នេះបើតាម អ្នកវិភាគទីផ្សារនិងអ្នកជំនាញខាងឧស្សហកម្មរថយន្ត បង្ហាញការយល់ឃើញប្រាប់ទៅទី AFP ថ្ងៃសៅរ៍ ទី២២មេសា ។
ប្រភពពីទូរទស្សន៍ជាតិចិន CCTVបានបង្ហាញថា ក្រុមហ៊ុនចិនមួយនៅ Shenzhen ខេត្តខាងត្បូងស្រុកចិន គឺបង្ហាញកម្មវត្ថុផលិតរថយន្តនាំចេញ៣សែនគ្រឿង នៅដើមឆ្នាំ២០២៣ នេះ ដែលឆ្នាំទៅមិញ ត្រឹមតែ៥ម៉ឺនគ្រឿងប៉ុណ្ណោះ៕
