ដោយ: គង់ លាងហួរ
បាងកក: យោងតាមក្រុមប្រឹក្សាវិនិយោគរបស់ប្រទេសថៃបានឱ្យដឹងកាលពីថ្ងៃព្រហស្បតិ៍ ម្សិលមិញនេះថា ក្រុមហ៊ុនផលិតរថយន្តចិន Changan Auto គ្រោងបោះទុនវិនិយោគ២៨៥លានដុល្លារ នៅក្នុងរោងចក្រមួយក្នុងប្រទេសថៃ ដើម្បីផលិតរថយន្តអគ្គិសនី (EVs) ចំនួន១សែនគ្រឿងក្នុងមួយឆ្នាំ។
លោក Narit Therdsteerasukdi អគ្គលេខាធិការក្រុមប្រឹក្សាភិបាលបានមានប្រសាសន៍ថា ក្រុមហ៊ុននេះ មានគោលបំណងលក់រថយន្តអគ្គិសនីEV នៅក្នុងប្រទេសថៃ តំបន់អាស៊ីអាគ្នេយ៍ អូស្ត្រាលី និងអាហ្វ្រិកខាងត្បូង។
ប្រទេសថៃគែជាមជ្ឈមណ្ឌលដំឡើង និងនាំចេញរថយន្តធំជាងគេទី៤ នៅតំបន់អាស៊ី សម្រាប់ក្រុមហ៊ុនផលិតរថយន្តធំៗ ដូចជាក្រុមហ៊ុន Toyota និង Honda។
លើសពីនេះទៅទៀតនោះ ឧស្សាហកម្មនេះគ្រប់ដណ្តប់ប្រហែល១០ភាគរយ នៃផលិតផលក្នុងស្រុកសរុបរបស់ប្រទេសថៃ និងការងារផលិតកម្ម។
លោក Narit បានបន្តថា “ការសម្រេចចិត្តរបស់ក្រុមហ៊ុន Changan ក្នុងការវិនិយោគនៅក្នុងប្រទេសថៃ គឺជាព្រឹត្តិការណ៍ដ៏សំខាន់មួយ ក្នុងការលើកកម្ពស់ប្រទេសនេះ ក្នុងនាមជាមូលដ្ឋានផលិតកម្ម EV ដ៏សំខាន់របស់ពិភពលោក”។
ក្រុមហ៊ុនផលិតរថយន្ត EV របស់ចិនផ្សេងទៀតដូចជា BYD ក៏បានវិនិយោគនៅក្នុងរោងចក្រថៃផងដែរ ដោយសារតម្រូវការកើនឡើង ក្នុងចំណោមអ្នកប្រើប្រាស់ក្នុងស្រុក ដែលកំពុងជ្រើសរើសពីម៉ាកល្បីៗដូចជា Great Wall Motors និង Tesla ៕