ដោយ: គង់ លាងហួរ
ភ្នំពេញ: យោងតាមទិន្នន័យពាណិជ្ជកម្មរបស់អគ្គនាយកដ្ឋានគយ និងរដ្ឋាករបានឱ្យដឹងថា នៅក្នុងត្រីមាសទី១ ដើមឆ្នាំ ២០២៣នេះ ការនាំចេញកៅស៊ូកម្ពុជា ទទួលបានថវិកាប្រមាណ១៦៨លានដុល្លារ កើនឡើង៤២,៨ភាគរយ បើធៀបនឹងរយៈពេលដូចគ្នា កាលពីឆ្នាំ២០២២ ដែលមានត្រឹមតែ១១៧លានដុល្លារ។
យោងតាមទិន្នន័យបានបង្ហាញថា ការនាំចេញកៅស៊ូរបស់កម្ពុជា នៅក្នុងខែមករា ឆ្នាំ២០២៣ មានការកើនឡើង៥៩,៨ភាគរយ បើធៀបនឹងខែមករា ឆ្នាំ២០២២ ដោយរកចំណូលបានចំនួន៥៤លានដុល្លារ។
ចំណែក នៅក្នុងខែកុម្ភៈ ការនាំចេញកៅស៊ូ ដែលបានចុះបញ្ជីមានកំណើន៦៧,៤ភាគរយ និងរកប្រាក់ចំណូលបាន៥៩លានដុល្លារ។ ដោយឡែក ការនាំចេញកៅស៊ូក្នុងខែមីនា ឆ្នាំ២០២៣ ទទួលបានចំណូល៥៥លានដុល្លាររបស់ប្រទេស កើនឡើង១៣,១ភាគរយបើធៀបនឹងរយៈពេលដូចគ្នាក្នុងឆ្នាំ២០២២ មានចំនួន៤៨,៥លានដុល្លារ។
កាលពីឆ្នាំ ២០២២ កម្ពុជា បានរកចំណូលពីការនាំចេញកៅស៊ូធម្មជាតិ និងផលិតផលកៅស៊ូ បានប្រមាណ៥៤១,៦៦លានដុល្លារ មានការកើនឡើង២៨,៣ភាគរយ បើធៀបនឹងឆ្នាំ២០២១ បើទោះបីជាមានស្ថានភាពមិនល្អ រួមទាំងការធ្លាក់ចុះនៃតម្លៃកៅស៊ូធម្មជាតិយ៉ាងណាក្តី។
ទីផ្សារកៅស៊ូកម្ពុជា នាំចេញទៅប្រទេសចិន វៀតណាម ម៉ាឡេស៊ី សិង្ហបុរី ឥណ្ឌា និងសហភាពអឺរ៉ុប (EU)។
គិតត្រឹមឆ្នាំ២០២២ ផ្ទៃដីដាំកៅស៊ូ សរុបមានចំនួន៤០៤.០៤៤ហិកតា ក្នុងនោះ ផ្ទៃដីចៀរជ័រមានចំនួន ៣១០.១៩៣ហិកតា ស្មើនឹង៧៧ភាគរយ និងផ្ទៃដីថែទាំមានចំនួន៩៣.៨៥១ហិកតា ស្មើនឹង២៣ភាគរយ។
ទន្ទឹមនឹងនេះ សមាគមបណ្តាប្រទេសផលិតកៅស៊ូធម្មជាតិ (ANRPC) បានបញ្ជាក់ថា ការផ្គត់ផ្គង់កៅស៊ូត្រូវបានគេរំពឹងទុកថា នឹងនៅតែមានភាពតឹងតែង នៅក្នុងរយៈពេលប៉ុន្មានខែខាងមុខ
ដោយសារផ្នែកមួយ គឺមានជំងឺស៊ីស្លឹកដែលបានញាំញី ក្នុងចម្ការនៅភាគខាងជើងប្រទេសឥណ្ឌូនេស៊ី និងភាគខាងត្បូងនៃប្រទេសម៉ាឡេស៊ី៕