ដោយ: គង់ លាងហួរ
ភ្នំពេញ: នៅក្នុងត្រីមាសទី១ ឆ្នាំ២០២៣នេះ ក្រុមហ៊ុន Konecranes បានបញ្ជាទិញរថយន្តស្ទូចចល័តម៉ាក Konecranes Gottwald ជំនាន់ទី៦ចំនួន២គ្រឿង ពីកំពង់ផែស្វយ័តក្រុងព្រះសីហនុដែលនេះ ជាការបញ្ជាទិញឧបករណ៍ស្ទូចចល័ត ជាលើកដំបូងរបស់ខ្លួននៅក្នុងប្រទេសកម្ពុជា។
រថយន្តស្ទូចចល័តនេះ នឹងត្រូវបានដឹកជញ្ជូនទៅអោយក្រុមហ៊ុនក្នុងត្រីមាសទី៤នៃឆ្នាំ២០២៣នេះ។
កំពង់ផែស្វយ័តក្រុងព្រះសីហនុជាកម្មសិទ្ធិ និងគ្រប់គ្រងដោយរដ្ឋាភិបាលកម្ពុជា ហើយដើរតួនាទីយ៉ាងសំខាន់ ក្នុងសេដ្ឋកិច្ចជាតិ ដោយវាជាកំពង់ផែទឹកជ្រៅតែមួយគត់របស់ប្រទេសកម្ពុជា។
ដោយសារអត្រានៃការដឹកជញ្ជូនទំនិញ បន្តកើនឡើងជារៀងរាល់ឆ្នាំ កំពង់ផែស្វយ័តក្រុងព្រះសីហនុ បានសម្រេចចិត្តបន្ថែមរថយន្តស្ទូចកំពង់ផែចល័ត ដើម្បីបង្កើនសមត្ថភាព និងប្រសិទ្ធភាព។
លោក ទី សាគន្ធ អគ្គនាយករងបច្ចេកទេសកំពង់ផែស្វយ័តក្រុងព្រះសីហនុបានមានប្រសាសន៍ថា “រថយន្តស្ទូចចល័ត Konecranes Gottwald Mobile Harbor Cranes ជាដំណោះស្រាយត្រឹមត្រូវ ដោយផ្តល់នូវប្រតិបត្តិការរហ័ស សម្រាប់ការផ្ទេរកប៉ាល់ រួមផ្សំជាមួយនឹងប្រសិទ្ធភាពដ៏គួរឱ្យចាប់អារម្មណ៍”។ លោកបន្តថា “ប្រព័ន្ធអគ្គិសនីរួមជាមួយការផ្គត់ផ្គង់ថាមពល ពីខាងក្រៅអនុញ្ញាតឱ្យយើងកាត់បន្ថយការបញ្ចេញផ្សែងនៅនឹងកន្លែង និងកាត់បន្ថយតម្លៃប្រតិបត្តិការ”។
លោក Holger Wagner អ្នកគ្រប់គ្រងផ្នែកលក់ប្រចាំតំបន់របស់ក្រុមហ៊ុន Konecranes បានអះអាងថា “រថយន្តស្ទូចចល័តទាំងពីរនេះតំណាងឱ្យព្រឹត្តិការណ៍ ដ៏សំខាន់មួយសម្រាប់ Konecranes នៅកម្ពុជា ហើយយើងសូមអរគុណ ដល់កំពង់ផែស្វយ័តក្រុងព្រះសីហនុ ក៏ដូចជា Ogawa Seiki Co., Ltd (OSC) និងទីភ្នាក់ងារសហប្រតិបត្តិការអន្តរជាតិជប៉ុន ( JICA) សម្រាប់សម្រួលដល់ការបញ្ជាទិញ”។
ការផ្តោតលើអតិថិជន និងការប្តេជ្ញាចិត្តចំពោះកំណើនអាជីវកម្ម និងការកែលម្អជាបន្តបន្ទាប់ជំរុញឱ្យ ក្រុមហ៊ុន Konecranes ក្លាយជាក្រុមហ៊ុននាំមុខគេក្នុងវិស័យស្ទូចទំនិញ។ នេះត្រូវបានគាំទ្រដោយការវិនិយោគក្នុងការធ្វើឌីជីថល និងបច្ចេកវិទ្យា បូករួមទាំងការងារក្នុងការធ្វើឱ្យលំហូរសម្ភារៈកាន់តែមានប្រសិទ្ធភាព ជាមួយនឹងដំណោះស្រាយជួយដល់សេដ្ឋកិច្ច និងប្រកបដោយសុវត្ថិភាព៕