ដោយ: គង់ លាងហួរ
ភ្នំពេញ: លោកសំ ច័ន្ទមុនី មន្ត្រីផ្នែកទំនាក់ទំនងសាធារណៈ និងជំរុញការវិនិយោគឯកជន របស់ក្រុមប្រឹក្សាអភិវឌ្ឍន៍កម្ពុជា (CDC ) បានឱ្យដឹងថា ការវិនិយោគក្នុងឧស្សាហកម្មបច្ចេកវិទ្យាខ្ពស់ នៅកម្ពុជាអាចទាក់ទាញការលើកលែងពន្ធរយៈពេល៩ឆ្នាំ។
ក្នុងពេលធ្វើបទបង្ហាញអំពីឱកាសវិនិយោគនៅកម្ពុជា ដើម្បីជាប្រយោជន៍ដល់គណៈប្រតិភូធុរកិច្ច កម្រិតខ្ពស់មកពីប្រទេសឥណ្ឌានៅសណ្ឋាគារ Sun and Moon Riverside ក្នុងរាជធានីភ្នំពេញលោក សំ ច័ន្ទមុនី បានមានប្រសាសន៍ថា ក្រៅពីឧស្សាហកម្មនេះក៏អាចទទួលបាននូវការលើកទឹកចិត្ត ផ្សេងទៀតជាច្រើនផងដែរសម្រាប់រយៈពេល១៥ឆ្នាំ។
យោងតាមមន្ត្រី CDC បានឱ្យដឹងថា កម្ពុជាជាប្រទេសបើកចំហរបំផុតមួយក្នុងពិភពលោក ហើយយើងអនុញ្ញាតឱ្យមានកម្មសិទ្ធិបរទេស១០០ភាគរយនៅក្នុងអាជីវកម្មជាង៩៩ភាគរយ។
លោកបានមានប្រសាសន៍ថា “ការវិនិយោគពីបរទេស១០០ភាគរយត្រូវបានអនុញ្ញាតនៅក្នុងអាជីវកម្ម និងឧស្សាហកម្មស្ទើរតែទាំងអស់នៅក្នុងប្រទេសកម្ពុជា ដែលធ្វើឱ្យប្រទេសនេះ មានលក្ខណៈល្អបំផុត ក្នុងពិភពលោកសម្រាប់ការវិនិយោគពីបរទេស”។
កម្ពុជាមិនអនុញ្ញាតឱ្យជនបរទេសទិញដី ក្នុងប្រទេសនោះទេ ប៉ុន្តែពួកគេអាចកាន់កាប់ខុនដូ ឬអាផាតមិនចាប់ពីជាន់ទីមួយតទៅ។ ពន្ធលើប្រាក់ចំណូលសាជីវកម្ម សម្រាប់ឧស្សាហកម្មភាគច្រើន ក៏ត្រូវបានរក្សាក្នុងអត្រា២០ភាគរយ នៅក្នុងប្រទេសកម្ពុជាផងដែរ។
ការលើកលែងពន្ធ សម្រាប់ការវិនិយោគបរទេស ក្នុងប្រទេសកម្ពុជាមានរយៈពេលចាប់ពី៣ឆ្នាំទៅដល់៩ឆ្នាំ។ ក្រុមហ៊ុនឧស្សាហកម្ម ក៏ត្រូវបានអនុញ្ញាតឱ្យនាំចូលសម្ភារសំណង់ និងឧបករណ៍សំណង់ ដោយមិនចាំបាច់បង់ពន្ធផងដែរ។
អត្ថប្រយោជន៍មួយទៀត នៃការវិនិយោគនៅកម្ពុជា គឺដោយ សារប្រទេសនេះ មានកិច្ចព្រមព្រៀងពាណិជ្ជកម្មទ្វេរភាគី ជាមួយមហាអំណាច ឧស្សាហកម្មកំពូលមួយចំនួនក្នុងពិភពលោក ដូចជាប្រទេសចិន និងកូរ៉េខាងត្បូង។
បច្ចុប្បន្ននេះ កម្ពុជាក៏កំពុងបញ្ចប់សន្ធិសញ្ញាពាណិជ្ជកម្មទ្វេរភាគីជាមួយ UAE ហៅថា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ (CEPA)៕
