ដោយៈ គង់ ម៉ាលីនណា
ភ្នំពេញៈ ធនាគារជាតិនៃកម្ពុជា (NBC) និងសមាគមមីក្រូហិរញ្ញវត្ថុកម្ពុជា (CMA) បានរួមគ្នាដាក់ឱ្យដំណើរ ការគម្រោងស្តីពី “ការពង្រឹងសុវត្ថិភាពហិរញ្ញវត្ថុក្នុងសហគមន៍”។
កម្មវិធីនេះ ធ្វើឡើងក្នុងគោលបំណងលើកកម្ពស់ ចំណេះដឹងផ្នែកហិរញ្ញវត្ថុ សិទ្ធិ និងកិច្ចការពារអតិថិជនតាមសហគមន៍ក្នុងឃុំ-សង្កាត់។
យោងតាមសេចក្តីប្រកាសព៏ត៌មាន របស់សមាគមមីក្រូហិរញ្ញវត្ថុកម្ពុជា នៅថ្ងៃទី២៧ ខែកុម្ភៈ បានឱ្យដឹងថា គម្រោង “ការពង្រឹងសុវត្ថិភាពហិរញ្ញវត្ថុក្នុងសហគមន៍” សំដៅលើកកម្ពស់ លទ្ធភាពទទួលបាន និងប្រើប្រាស់សេវាហិរញ្ញវត្ថុផ្លូវការ ប្រកបដោយសុវត្ថិភាពនៅតាមសហគមន៍ ដែលនឹងចូលរួមជំរុញគោលនយោបាយជាតិស្តីពី ភូមិឃុំមានសុវត្ថិភាព។
គម្រោង “ការពង្រឹងសុវត្ថិ ភាពហិរញ្ញវត្ថុក្នុងសហគមន៍” នឹងត្រូវអនុវត្តសាកល្បង ក្នុងខេត្តកំពង់ធំ -កំពង់ស្ពឺ -ស្វាយរៀង និងខេត្តបាត់ដំបង ចាប់ ពីឆ្នាំ២០២៣នេះ ហើយនឹងបន្តពង្រីកវិសាលភាពនៅឆ្នាំបន្តបន្ទាប់។
សេចក្តីប្រកាសព័ត៌មាននេះបន្តថា ការបង្កើតគម្រោងនេះ គឺផ្អែកលើលទ្ធផលនៃការសិក្សាស្រាវជ្រាវផ្សេងៗ ធ្វើឡើងក្នុងឆ្នាំ២០២២ ដោយ អង្គការJICA និងសមាគមមីក្រូហិរញ្ញវត្ថុកម្ពុជា ដោយមានការគាំទ្រពី Cerise+SPTF និងអង្គការADA ប្រទេសលុចហ្សំបួរ។
ការសិក្សា រួមទាំងសិក្ខាសាលាពិគ្រោះយោបល់ ដែលបានធ្វើឡើងជាមួយអាជ្ញាធរមូលដ្ឋាន បានរកឃើញស្រដៀង គ្នាអំពីសារៈសំខាន់នៃចំណេះដឹងផ្នែកហិរញ្ញវត្ថុ ដែលនាំទៅដល់ការជំរុញបរិយាប័ន្នហិរញ្ញវត្ថុនៅកម្រិតមូលដ្ឋាន។
សមាគមមីក្រូហិរញ្ញវត្ថុកម្ពុជាលើកឡើងថា លទ្ធផលនៃការស្រាវជ្រាវបានឆ្លុះបញ្ចាំងតួនាទី ដ៏សំខាន់របស់ប្រជាពលរដ្ឋ និងអាជ្ញាធរមូលដ្ឋាន ក្នុងការជួយលើកកម្ពស់ និង បញ្ជ្រាបចំណេះដឹងផ្នែកហិរញ្ញវត្ថុ សម្រាប់ការទទួលបានសេវាហិរញ្ញវត្ថុផ្លូវការ និងប្រកបដោយសុវត្ថិភាព ដើម្បីរួម ចំនែកធ្វើឱ្យប្រសើរឡើងនូវជីវភាពរបស់ប្រជាជន នៅតាមមូលដ្ឋាន៕
