ដោយៈ គង់ ម៉ាលីនណា
ភ្នំពេញៈ លោកជំទាវអ៉ឹង កន្ថាផាវីរដ្ឋមន្រ្តីក្រសួងកិច្ចការនារីបានមានប្រសាសន៍ថា វត្តមានស្ត្រីក្នុងការងារសង្គម មានចំនួនកាន់តែច្រើនឡើង ដែលពួកគេមានតួនាទីដ៏សំខាន់ ក្នុងការចូលរួមចំណែកកសាង និងអភិវឌ្ឍសង្គម ជាពិសេសការជំរុញកំណើនសេដ្ឋកិច្ចកម្ពុជា ហើយមានស្ត្រីជាច្រើនបានក្លាយជាម្ចាស់ក្រុមហ៊ុន និងម្ចាស់សហគ្រាសនៅកម្ពុជា។
លោកជំទាវបានថ្លែងបែបនេះ ក្នុងកិច្ចប្រជុំបូកសរុបលទ្ធផលការងារ ឆ្នាំ ២០២២ របស់ក្រុមប្រឹក្សាជាតិកម្ពុជាដើម្បីស្ត្រី កាលពីថ្ងៃទី ២១ ខែកុម្ភៈ ឆ្នាំ ២០២៣។
នៅឆ្នាំ ២០២២ ចំនួនស្ត្រីធ្វើជាម្ចាស់ក្រុមហ៊ុន បានកើនឡើងជាង ២០%។ ចំណែកឯចំនួនស្ត្រី ដែលជាម្ចាស់សហគ្រាស ក៏បានកើនឡើងជាង៣០ភាគរយ។
លោកស្រីអ៉ឹង កន្ថាផាវី ដែលក៏ជាប្រធានក្រុមប្រឹក្សាជាតិកម្ពុជា ដើម្បីស្ត្រី ផងដែរនោះ ក៏បានឱ្យដឹងថា ការងាររបស់រដ្ឋមន្ត្រីក្នុងកិច្ចការជួយជ្រោមជ្រែងស្ត្រីខ្មែរ ត្រូវទទួលបានការកោតសរសើរ ពីព្រះវររាជមាតាជាតិខ្មែរ ព្រះប្រធានកិត្តិយសនៃក្រុមប្រឹក្សាជាតិកម្ពុជា ដើម្បីស្ត្រី។
លោកស្រីបានបន្តថា លទ្ធផលដែលសម្រេចជាច្រើនទៀត នៅលើវិស័យផ្សេងៗ ជាពិសេសការអភិវឌ្ឍសមត្ថភាពស្ត្រី ជាថ្នាក់ដឹកនាំនៅថ្នាក់ជាតិ និងថ្នាក់ក្រោមជាតិ ការអភិវឌ្ឍសមត្ថភាពដល់ស្ត្រី ជាថ្នាក់ដឹកនាំ និងមន្ត្រីរាជការជានារី នៅថ្នាក់ជាតិ ត្រូវបានយកចិត្តទុកដាក់ខ្ពស់ ពីក្រសួងកិច្ចការនារី និងគ្រប់ភាគីពាក់ព័ន្ធ។
លោកស្រីរដ្ឋមន្ត្រីកិច្ចការនារីបានឲ្យដឹងថា កាលពីឆ្នាំ ២០២២ មន្ត្រីរាជការស្ត្រី មានចំនួន ៦ ៨២២ នាក់ ដែលបានទទួលការពង្រឹងសមត្ថភាពលើចំណេះដឹង និងជំនាញផ្សេងៗ ទាំងនៅក្នុងប្រទេស និងក្រៅប្រទេស។
ប្រធានសមាគមសហគ្រិនស្ត្រីកម្ពុជា លោកស្រី កែវ មុំ ធ្លាប់បានលើកឡើងថា ការប្រកបមុខរបររកស៊ី ទទួលទានរបស់សហគ្រិនជាស្ត្រី ក្នុងឆ្នាំ ២០២២ គឺនៅមានកម្រិតនៅឡើយ ក្នុងការផលិត និងការលក់ផលិតផលរបស់ខ្លួននៅតាមទីផ្សារ បន្ទាប់ពី វិបត្តិកូវីដ១៩ បានកើតឡើង។
លោកស្រីបន្តថា “នៅឆ្នាំ ២០២៣ ក្នុងខ្សែចង្វាក់ផលិតកម្មក្នុងស្រុក នឹងមានការងើបឡើងកាន់តែល្អប្រសើរ”៕