ដោយៈ គង់ ម៉ាលីនណា
ភ្នំពេញៈ អ្នកវិនិយោគរោងម៉ាស៊ីនកិនស្រូវចំនួន ៤១ បានបង្ហាញឆន្ទៈនៅក្នុងការធ្វើកិច្ចសន្យាកសិកម្ម ជាមួយសហគមន៍កសិកម្ម ដើម្បីអាចធានាបានប្រភេទស្រូវតាមការចង់បាន និងមានប្រភពនៃការដាំដុះច្បាស់លាស់។
កិច្ចការនេះធ្វើឡើង ខណៈអ្នកជំនាញក្នុងវិស័យស្រូវ អង្ករអះអាងថា កិច្ចសន្យាកសិកម្ម គឺជាចំណែកមួយក្នុងការលើកកម្ពស់ សមត្ថភាពនាំចេញអង្ករកម្ពុជាទៅកាន់ទីផ្សារអន្តរជាតិឱ្យបានកាន់តែច្រើន។
រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោក យ៉ង សាំងកុមារ បានមានប្រសាសន៍ប្រាប់BTV កាលពីដើមសប្តាហ៍នេះថា បច្ចុប្បន្នក្រុមការងារនៃក្រសួងកសិកម្ម កំពុងចុះស្រង់ចំនួនឱ្យបានច្បាស់នៃសហគមន៍ ដែលមានការផលិតពូជស្រូវ ខណៈក្នុងអំឡុងពេលចុះបេសកកម្ម តាមបណ្ដាខេត្តនាពេលប៉ុន្មានខែមកនេះ គឺមានរោងម៉ាស៊ីនកិនស្រូវ ៤១ កន្លែងបានចង់ធ្វើកិច្ចសន្យាជាមួយកសិករ ដើម្បីទិញស្រូវក្នុងតម្លៃសមរម្យ និងមានប្រភពពូជច្បាស់លាស់។
លោកថ្លែងថា “ការកសាងប្រព័ន្ធផលិត និងបែងចែកពូជស្រូវកំពុងធ្វើដំណើរទៅមុខ ដើម្បីធានាចំពោះអ្នកផលិតពូជស្រូវល្អ មានទីផ្សារសម្រាប់លក់ពូជ របស់កសិករ ដែលជាផ្នែកសំខាន់នៃប្រព័ន្ធចង្វាក់ផលិតកម្ម និងទីផ្សារស្រូវអង្ករ”។
ជាមួយគ្នានេះ លោកឧកញ៉ាចាន់ សុខឃាំង ប្រធានសហព័ន្ធស្រូវអង្ករកម្ពុជាបានមានប្រសាសន៍ឲ្យដឹងថា កិច្ចសន្យាកសិកម្ម គឺជាយន្តការដ៏ល្អដែលនឹងផ្តល់ផលវិជ្ជមាន ទៅគូភាគីពាក់ព័ន្ធទាំងអស់ ពិសេសប្រជាកសិករអ្នកបង្កបង្កើនផល និងម្ចាស់រោងម៉ាស៊ីន ឬអ្នកកែច្នៃ/នាំចេញអង្ករ។ កិច្ចសន្យាកសិកម្ម អាចជួយឱ្យអ្នកប្រមូលទិញ ឬរោងម៉ាស៊ីនកិនស្រូវ/កែច្នៃ ទទួលបានប្រភេទស្រូវដែលមានពូជសុទ្ធល្អ មានប្រភពដាំដុះច្បាស់លាស់ ខណៈកសិករនឹងទទួលបាននូវការធានាទីផ្សារ ទទួលបានតម្លៃសមរម្យ និងអាចមានការជួយគាំទ្របច្ចេកទេស និងពូជមួយចំនួនផងដែរ។
លោកបន្តថា បន្ថែមពីលើនេះភាគីក្នុងកិច្ចសន្យាកសិកម្ម ក៏អាចកំណត់រួមគ្នាអំពីពូជ និងបរិមាណផលិតតាមការបញ្ជាទិញផងដែរ។ ទោះយ៉ាងណា ការធ្វើកិច្ចសន្យារវាងសហគមន៍ដាំដុះស្រូវ និងអ្នកកែច្នៃនៅក្នុងប្រទេសកម្ពុជានៅពេលនេះ គឺមិនទាន់មានច្រើនទេ។
លោកឧកញ៉ាចាន់ សុខឃាំងបានបញ្ជាក់ថា យន្តការការធ្វើកិច្ចសន្យាកសិកម្ម គឺជាផ្នែកមួយរួមចំណែកជំរុញចក្ខុវិស័យ ការនាំចេញអង្ករកម្ពុជាទៅទីផ្សារអន្តរជាតិ ឱ្យឆាប់បានទទួលជោគជ័យ ព្រោះតាមរយៈកិច្ចសន្យាកសិកម្ម គឺអាចជួយឱ្យរោងម៉ាស៊ីន និងក្រុមហ៊ុននាំចេញនីមួយៗ អាចមានស្តុកអង្ករសម្រាប់នាំចេញគ្រប់គ្រាន់ ខណៈអង្ករទាំងអស់នោះសុទ្ធតែមានប្រភពច្បាស់លាស់ និងមានគុណភាពតាមការចង់បាន របស់អ្នកបញ្ជាទិញ។
លោកបន្តថា នៅពេលយើងមានព័ត៌មានពីប្រភេទអង្ករ និងការធានាគុណភាពច្បាស់លាស់ វាក៏បង្កភាពងាយស្រួល សម្រាប់ការផ្សព្វផ្សាយទៅលើទីផ្សារអន្តរជាតិផងដែរ៕