ដោយ: គង់ លាងហួរ
អន្តរជាតិ: ប្រទេសឥណ្ឌា ត្រូវបានគេរំពឹងថា នឹងមានសមត្ថភាពផលិតទូរសព្ទដៃ iPhones របស់ក្រុមហ៊ុន Apple ដល់ទៅ៥០ភាគរយ នៅឆ្នាំ២០២៧ ពោលគឺកើនឡើងពីតិចជាង៥ភាគរយ នាពេលបច្ចុប្បន្ន ដើម្បីឈានទៅស្មើនឹងទំហំផលិតកម្មនៅក្នុងប្រទេសចិន។
លោក Luke Lin អ្នកវិភាគនៅអង្គភាពស្រាវជ្រាវកាសែរបស់តៃវ៉ាន់ Digi Times ដែលផ្តោតលើបច្ចេកវិទ្យាបានមានប្រសាសន៍ថា ល្បឿននៃការផ្លាស់ប្តូរស្រុកខ្សែសង្វាក់ផ្គត់ផ្គង់ទៅកាន់ប្រទេសឥណ្ឌានឹងត្រូវបានពន្លឿននៅពេលអនាគត ដោយសារតែមានតម្រូវការធ្វើពិពិធកម្ម ខណៈមានភាពមិនច្បាស់លាស់ ក្នុងការគ្រប់គ្រងជំងឺរាតត្បាត របស់ប្រទេសចិន។
ប្រទេសឥណ្ឌា ដែលបានវ៉ាដាច់ចក្រភពអង់គ្លេសកាលពីឆ្នាំមុន ដើម្បីដណ្តើមចំណាត់ថ្នាក់ជាប្រទេស ដែលមានសេដ្ឋកិច្ចធំជាងគេទី៥របស់ពិភពលោក ត្រូវបានគេព្យាករណ៍រួចហើយថា នឹងមានរហូតដល់២៥ភាគរយនៃផលិតកម្ម iPhone សរុប នៅចុងឆ្នាំ២០២៣ និងរហូតដល់៤០ភាគរយ នៅឆ្នាំ២០២៥។
ប្រទេសចិន មានផលិតកម្មទូរសព្ទដៃ iPhone រហូតទៅដល់៨៥ភាគរយនៅ ទូទាំងពិភពលោកកាលពីឆ្នាំ២០២២ កំពុងមានហានិភ័យនៃការបាត់បង់តួនាទីលេចធ្លោរបស់ខ្លួន ជាមជ្ឈមណ្ឌលផលិតកម្ម សម្រាប់ឧបករណ៍ Apple ដោយសារតែទំនាក់ទំនងវាងសហរដ្ឋអាមេរិក និងចិន ។
លោក Luke Lin រំពឹងថា ប្រទេសឥណ្ឌា និងវៀតណាម នឹងក្លាយជា “អ្នកទទួលផលដ៏ធំបំផុត” ពីកិច្ចខិតខំប្រឹងប្រែងរបស់ក្រុមហ៊ុន Apple ដើម្បីផ្លាស់ប្តូរខ្សែសង្វាក់ផ្គត់ផ្គង់ផលិតកម្មរបស់ខ្លួនបន្ថែមទៀត ចេញពីប្រទេសចិន។
ក្រុមហ៊ុន Foxconn Technology Group ដែលមានមូលដ្ឋាននៅតៃវ៉ាន់ ដែលត្រូវបានគេស្គាល់ជាផ្លូវការថា Hon Hai Precision Industry គឺជាអ្នកម៉ៅការក្រុមហ៊ុន Apple ដ៏ខ្លាំងក្លាបំផុតមួយ ក្នុងការជំរុញកិច្ចខិតខំប្រឹងប្រែងរបស់ខ្លួននៅក្នុងប្រទេសឥណ្ឌា។
កាលពីខែធ្នូកន្លងទៅ ក្រុមហ៊ុន Foxconn បានធ្វើការបញ្ចូលសាច់ប្រាក់ចំនួន៥០០លានដុល្លារអាមេរិក ទៅក្នុងក្រុមហ៊ុនបុត្រសម្ព័ន្ធរបស់ខ្លួន គឺក្រុមហ៊ុន Foxconn Hon Hai Technology India Mega Development។
ចំណែក ក្រុមហ៊ុនទូរសព្ទស្មាតហ្វូនធំៗផ្សេងទៀតក៏កំពុងបង្កើនការផលិតរបស់ខ្លួននៅក្រៅប្រទេសចិនផងដែរ ។ នេះបើយោងតាមរបាយការណ៍របស់ Digi Times។ ជាក់ស្តែង ក្រុមហ៊ុន Samsung Electronics បាននឹងកំពុងផ្លាស់ប្តូរសមត្ថភាពផលិតស្មាតហ្វូន Android របស់ខ្លួនកាន់តែច្រើនចេញពីប្រទេសចិន ចាប់តាំងពីឆ្នាំ២០១៩ មកកាន់ប្រទេសវៀតណាមជាចម្បង៕
