ដោយ វុត្ថា
ភ្នំពេញៈ ដើម្បីធានាប្រសិទ្ធិភាព នៃប្រព័ន្ធវាយតម្លៃថ្លៃអចលនទ្រព្យ ចាំបាច់ត្រូវមានការតាមដានត្រួតពិនិត្យ និងវាយតម្លៃការអនុវត្តរបស់វិស័យសាធារណការ ដោយត្រូវបង្កើតអង្គភាពមួយទទួលបន្ទុកការងារនេះ។
យោងតាមប្រភពគោលនយោបាយជាតិស្តីពី ប្រព័ន្ធវាយតម្លៃថ្លៃអចលនទ្រព្យរបស់ក្រសួងរៀបចំដែនដី នគរូបណីយកម្ម និងសំណង់បញ្ជាក់ថា ក្នុងជំហានដំបូងអង្គភាពនេះ គួរស្ថិតនៅក្នុងគណៈកម្មាធិការរវាយតម្លៃថ្លៃអចលនទ្រព្យថ្នាក់ជាតិ ថ្នាក់រាជធានី ខេត្ត និងថ្នាក់ក្រុង ស្រុក ខណ្ឌ ។
មន្ត្រីដែលមានភារៈតាមដានត្រួតពិនិត្យនេះ ត្រូវទទួលបន្ទុកបន្ថែមទៀតក្នុងការដោះស្រាយទំនាស់ និងបណ្តឹងតវ៉ាផ្សេងៗ ដែលកើតមានក្នុងយុត្តាធិការរបស់ខ្លួនលើលទ្ធផលនៃការវាយតម្លៃណាមួយ របស់វិស័យសាធារណៈ ដោយផ្អែកលើទិន្នន័យ/ព័ត៌មានដែលអាចរកបាននៅក្នុងមូលដ្ឋាន និងកត្តាផ្សេងៗទៀត ដែលជះឥទ្ធិពលលើតម្លៃថ្លៃដី និងសំណង់នៅជាប់ដីនៃទីតាំងនោះ។
ក្នុងការដោះស្រាយទំនាស់ ឬបណ្តឹងតវ៉ា ប្រសិនបើភាគីពាក់ព័ន្ធព្រមព្រៀងគ្នាទទួលយកមតិរបស់មន្ត្រីក្នុងផ្នែកនេះ ដោយមានការបញ្ជាក់ជាផ្លុវការនោះ ការដោះស្រាយលើការតវ៉ា ឬទំនាស់លើលទ្ធផលនៃការវាយតម្លៃ ត្រូវចាប់ទុកជាការយល់ព្រមជាផ្លូវការ។
ប៉ុន្តែបើភាគីពាក់ព័ន្ធ មិនយល់ព្រមទទួលយកមតិយោបល់របស់មន្ត្រី ក្នុងផ្នែកនេះទេ ការប្តឹងតវ៉ាត្រូវបញ្ជូនទៅដោះស្រាយនៅថ្នាក់លើទៀត តាមឋានានុក្រមរបស់ដល់ថ្នាក់ជាតិ និងជាចុងក្រោយទៅតុលាការ៕