ដោយៈ ម៉ាលីនណា
រុស្ស៊ីៈ លោកប្រធានាធិបតីវ្លាឌីមៀ ពូទីនកំពុងស្ថិតនៅលើផ្លូវនៃការសម្រេចចិត្តដ៏លំបាក បន្ទាប់ពីមេបញ្ជាការរុស្ស៉ី លោក អាឡិចសាន់ដឺ ខូដាកូវស្គី (Alexander Khodakovsky) បានផ្ដល់យោបល់ឱ្យប្រើប្រាស់អាវុធនុយក្លេអ៊ែរ ដើម្បីបញ្ចប់សង្រ្គាមជាមួយប្រទេសអ៊ុយក្រែន ដែលគាំាំទ្រដោយលោកខាងលិច។
លោកមេបញ្ជាការផ្ទាល់រុបនេះ បានមើលឃើញថា ការប្រើប្រាស់អាវុធនុយក្លេអ៊ែរ ជាមធ្យោបាយតែមួយគត់ដែលអាចឱ្យរុស្ស៉ី ទទួលបានជ័យជម្នះនៅក្នុងសង្រ្គាមអ៊ុយក្រែន។ នេះបើតាមការចេញផ្សាយដោយសារព័ត៌មាន Newsweek នៅថ្ងៃពុធ ទី១៤ ខែធ្នូ ឆ្នាំ២០២២។
លោក ខូដាកូវស្គី ធ្វើការសម្គាល់ខាងលើ នៅក្នុងបទសម្ភាសន៍ជាមួយទូរទស្សន៍រដ្ឋរុស្ស៉ីនៅក្នុងសប្ដាហ៍នេះ និងត្រូវបានបកប្រែជាភាសាអង់គ្លេសបង្ហោះលើបណ្ដាញ ទំនាក់ទំនងសង្គមTwitter ដោយអ្នកសារព័ត៌មាន BBCម្នាក់។
នៅកិច្ចសម្ភាសន៍នោះ មេបញ្ជាការរុស្ស៉ីរូបនេះក៏បានទទួលស្គាល់ដែរថារុស្ស៉ីមិនមានសមត្ថភាព គ្រប់គ្រាន់ដើម្បីប្រយុទ្ធតតាំង ជាមួយបក្សសម្ព័ន្ធយោធា NATO ដោយប្រើអាវុធទូទៅធម្មតាបាននោះទេ។
លោកខូដាកូវស្គី បានគូសបញ្ជាក់ថា យើងមិនមានលទ្ធភាពទេ។ យើងជាប្រទេសមួយដែលបច្ចុប្បន្ន កំពុងប្រយុទ្ធជាមួយលោកខាងលិចទាំងមូល ហើយយើងមិនអាចយកឈ្នះលើ NATO ដោយប្រើអាវុធធម្មតាបាននោះទេ។ ប៉ុន្តែ យើងមានអាវុធនុយក្លេអ៊ែរ សម្រាប់គ្រប់សេណារីយ៉ូ និងជាជម្រើសតែមួយគត់ដើម្បីឈ្នះ។
ប្រទេសរុស្ស៉ី បានសម្លុតគំរាមប្រើអាវុធនុយក្លេអ៊ែរ ជាច្រើនលើក ប្រសិនបើបក្សសម្ព័ន្ធយោធាNATO ចូលរួមដោយផ្ទាល់នៅក្នុងសង្រ្គាមអ៊ុយក្រែន តួយ៉ាងដូចជា ការបញ្ជូនកងទ័ពឱ្យមកជួយទីក្រុងកៀវ ប៉ុន្តែ NATO នៅតែដាក់កំហិតលើអន្តរាគមន៍របស់ខ្លួន ដោយបន្តបញ្ជូនអាវុធ និងជំនួយមនុស្សធម៌ឱ្យអ៊ុយក្រែន។
ទោះជាយ៉ាងណាកាលពីសប្តាហ៍មុន លោកវ្លាឌីមៀ ពូទីនបានបញ្ជាក់ថា លោកមិនឆ្កួតក្នុងការសម្រេចចិត្តប្រើប្រាស់អាវុធនុយក្លេអ៊ែរ ដើម្បីបញ្ចប់សង្រ្គាមជាមួយអ៊ុយ ក្រែននោះទេ៕