ដោយៈ សុខុម
វ៉ាស៊ីនតោន: រុស្សី ពេលនេះកំពុងងាកទៅប្រើរំសេវ ដែលទុកចោលច្រើនទសវត្សរ៍ដែលមានអត្រាស្អុយ ឬមិនផ្ទុះខ្ពស់ ខណៈសង្គ្រាមឈ្លានពានអ៊ុយក្រែន ដែលបន្តអូសបន្លាយជិត១០ខែមកនេះ ធ្វើឱ្យខ្លួនប្រើរំសេវរហូតអស់ពីស្តុក។ នេះបើយោងតាមទីភ្នាក់ងារព័ត៌មាន Reuters ចុះផ្សាយកាលពីថ្ងៃអង្គារ ទី១៣ ខែធ្នូ។
មន្ត្រីយោធាជាន់ខ្ពស់មួយរូបរបស់សហរដ្ឋអាមេរិក បានទម្លាយឱ្យដឹងកាលពីថ្ងៃច័ន្ទ ទី១២ ខែធ្នូ ក្នុងលក្ខខណ្ឌអនាមិក “រុស្ស៊ី បានទាញយកស្តុករំសេវចាស់ៗដែលនេះបង្ហាញថា ពួកគេបង្ខំចិត្តប្រើប្រាស់រំសេវចាស់ៗទាំងនោះ ដែលខ្លះផលិតឡើងតាំងពីដើមជាង៤០ឆ្នាំមុន”។
សហរដ្ឋអាមេរិកចោទប្រកាន់រុស្ស៊ី ថាងាកទៅពឹងពាក់អ៊ីរ៉ង់ និងកូរ៉េខាងជើង ដើម្បីរកទិញសព្វាវុធបន្ថែមទៀត ខណៈរុស្ស៊ី ប្រើរំសេវរហូតអស់ពីស្តុក។
ប្រភពដដែលបានវាយតម្លៃថា រុស្ស៊ី នឹងប្រើប្រាស់រំសេវល្អៗអស់ពីស្តុកទាំងស្រុងនៅដើមឆ្នាំ២០២៣ ប្រសិនបើមិនងាកទៅពឹងពាក់អ្នកផ្គត់ផ្គង់បរទេស និងប្រើស្តុករំសេវចាស់ៗទេនោះ។
ប្រភពដដែលបានគូសបញ្ជាក់ថា ការប្រើប្រាស់ស្តុករំសេវចាស់ៗគឺមានហានិភ័យខ្លាំងណាស់។
មន្ត្រីអាមេរិក និងអ៊ុយក្រែនបានទម្លាយឱ្យដឹងថា ប្រទេសអ៊ីរ៉ង់ បានបញ្ជូយន្តហោះដ្រូនវាយប្រហារទៅឱ្យរុស្ស៊ី សម្រាប់ប្រើប្រាស់ក្នុងសង្គ្រាមនៅអ៊ុយក្រែន។
ទន្ទឹមនេះ រុស្ស៊ី ក៏កំពុងព្យាយាមទិញកាំជ្រួចមីស៊ីល រាប់រយពាន់គ្រាប់ពីប្រទេសអ៊ីរ៉ង់ផងដែរ ហើយជាថ្នូរ រុស្ស៊ីបានសន្យាជួយផ្ដល់ការគាំទ្រ ដល់អ៊ីរ៉ង់ ផ្នែកយោធា និងបច្ចេកទេសក្នុងកម្រិតមិនធ្លាប់មាន។ នេះបើយោងតាមប្រេសិតរបស់អង់គ្លេស ប្រចាំអង្គការសហប្រជាជាតិបានទម្លាយឱ្យដឹងកាលពីថ្ងៃសុក្រ សប្ដាហ៍មុន៕ Reuters៕