ដោយ: លាងហួរ
ភ្នំពេញ: យោងតាមរបាយការណ៍ពីអគ្គនាយកដ្ឋានគយ និងរដ្ឋាករបានឱ្យដឹងថា ប្រទេសកម្ពុជាបាននាំចូលផលិតផលប្រេង និងឧស្ម័ន ដែលមានតម្លៃ៣,៣៨ពាន់លានដុល្លារ ក្នុងរយៈពេល១១ខែដំបូង កើនឡើងជិត៥៨ភាគរយ ធៀបនឹងរយៈពេលដូចគ្នាកាលពីឆ្នាំមុន។
ទោះបីជាយ៉ាងណាក្តី របាយការណ៍ដដែលនេះ មិនបានបង្ហាញអំពីបរិមាណប្រេង និងឧស្ម័ន ដែលប្រទេសកម្ពុជាបាននាំចូល ក្នុងអំឡុងខែមករាដល់ខែវិច្ឆិកា ក្នុងឆ្នាំ២០២២នេះនោះទេ។
បច្ចុប្បន្ននេះ កម្ពុជាពឹងផ្អែកទាំងស្រុងលើការនាំចូលប្រេង និងឧស្ម័ន ដោយសារធនធានប្រេង និងឧស្ម័ននៅបាតសមុទ្ររបស់ខ្លួន មិនទាន់ត្រូវបានទាញយកនៅឡើយ។
រដ្ឋមន្ត្រីក្រសួងរ៉ែ និងថាមពល លោកស៊ុយ សែម បានមានប្រសាសន៍ឲ្យដឹងកាលពីពេលថ្មីៗនេះថា តម្រូវការផលិតផលប្រេងនៅកម្ពុជា ត្រូវបានគេព្យាករណ៍ថា នឹងកើនឡើងដល់៤,៨លានតោន នៅឆ្នាំ២០៣០ ពោលគឺកើនឡើងពី ២,៨លានតោនក្នុងឆ្នាំ២០២០៕
លោករដ្ឋមន្ត្រីរូបនេះ បានមានប្រសាសន៍បន្ថែមថា កម្ពុជាត្រូវការការវិនិយោគបន្ថែមទៀត នៅក្នុងវិស័យនេះ ដើម្បីឆ្លើយតបទៅនឹងតម្រូវការ ដែលតែកំពុងកើនឡើង៕