ដោយ៖ សុផារី
ព្រះសីហនុ៖ យោងតាមរបាយការណ៍របស់មន្ទីរទេសចរណ៍ខេត្តព្រះសីហនុ មានភ្ញៀវទេសចរជាតិ អន្តរជាតិ និងពលរដ្ឋក្នុងខេត្ត បានចូលរួមដើរកម្សាន្តក្នុងព្រឹត្តិការណ៍បុណ្យសមុទ្រជុំទី៣ លើកទី៩ រយៈពេលបីថ្ងៃ ចាប់ពីថ្ងៃទី៩-១១ ខែធ្នូ ឆ្នាំ២០២២ មានប្រមាណជាង៧១ម៉ឺននាក់ កើន២៩% ធៀបនឹង បុណ្យសមុទ្រខេត្តព្រះសីហនឆ្នាំ២០១៧។
ព្រឹត្តិការណ៍បុណ្យសមុទ្របានផ្តល់ភាពសប្បាយរីករាយ និងជំរុញឱ្យខេត្តព្រះសីហនុ និងខេត្តជាប់សមុទ្រផ្សេងទៀតមានឱកាសផ្សព្វផ្សាយគោលដៅទេសចរណ៍របស់ខេត្ត ទាក់ទាញភ្ញៀវទេសចរជាតិអន្តរជាតិ ទស្សនាបានច្រើនថែមទៀត។
លោក គួច ចំរើន អភិបាលខេត្តព្រះសីហនុ ថ្លែងថា ក្នុងឱកាសបិទកម្មវិធីបុណ្យសមុទ្រនៅថ្ងៃទីយប់ថ្ងៃទី១១ខែធ្នូនេះថា មូលហេតុខេត្តព្រះសីហនុ មានមកទស្សនាបុណ្យសមុទ្រច្រើនកុះករខ្លាំង គឺដោយសារ ខេត្តព្រះសីហនុ មានសំណង់អគារខ្ពស់ៗរីកចំរើន មានឆ្នេរសមុទ្រស្អាត និងមានផ្លូវល្បឿនលឿន ហើយតាមរយៈការមានកំណើនភ្ញៀវទេសចរជាតិអន្តរជាតិនេះ បានធ្វើឲ្យខេត្តមានកំណើនសេដ្ឋកិច្ចកើនឡើងជាលំដាប់។
លោក គួច ចំរើន បញ្ជាក់ថា តាមរយៈកំណើនសេដ្ឋកិច្ចនេះបានធ្វើឱ្យប្រាក់ចំណូលជាមធ្យមរបស់ពលរដ្ឋម្នាក់ៗនៅក្នុងខេត្តព្រះសីហនុ មានទំហំប្រមាណ៤.១៨០ដុល្លារអាមេរិក ក្នុងមួយឆ្នាំ និងបានកាត់បន្ថយភាពក្រីក្រមកនៅត្រឹម១,៨៦% នៅក្នុងឆ្នាំ២០២២នេះ។
បុណ្យសមុទ្រនេះមានកម្មវិធីកម្សាន្តសប្បាយជាច្រើន ដូចជា កម្មវិធីតាំងពិព័រណ៍បង្ហាញសមិទ្ធផលរាជរដ្ឋាភិបាលកម្ពុជា និងបណ្តាស្ថានទូតនានានៅកម្ពុជា ការតាំងពិព័រណ៍មហោស្រពម្ហូបអាហារ សំលៀកបំពាក់ ផលិតផលភូមិ១ផលិតផល១ កម្មវិធីប្រគុំតន្ត្រីប្រមាណបីទីតាំងធំៗ កម្មវិធីប្រកួតកីឡាកម្សាន្ត និងមានកម្មវិធីកម្សាន្តតូចៗជាច្រើន ដែលគ្រប់កម្មវិធីទាំងនោះ គឺមានភ្ញៀវទេសចរជាតិអន្តរជាតិ និងពលរដ្ឋ ចូលទស្សនា និងទិញផលិតផលជាច្រើនកុះករ៕
