ដោយ: លាងហួរ
បាងកក: ក្រុមប្រឹក្សាភិបាលនៃការវិនិយោគថៃ (BOl) កំពុងបង្កើនកិច្ចខិតខំប្រឹងប្រែង ដើម្បីលើកទឹកចិត្តក្រុមហ៊ុនTesla Thailand ដែលទើបនឹងបង្កើតថ្មី ដើម្បីបោះទុនវិនិយោគក្នុងអាជីវកម្ម រថយន្តអគ្គិសនី(EV)នៅប្រទេសថៃ។
លោក Narit Therdsteerasukdi អគ្គលេខាធិការក្រុមប្រឹក្សាភិបាលនៃការវិនិយោគថៃបានមានប្រសាសន៍ថា ក្រុមហ៊ុន Tesla អាចចាប់អារម្មណ៍ លើគម្រោងវិនិយោគរថយន្តអគ្គិសនី(EV) ដោយសារតែរដ្ឋាភិបាលបានប្រកាស ពីគោលនយោបាយច្បាស់លាស់ ក្នុងការលើកកម្ពស់វិស័យរថយន្តជំនាន់ថ្មី។
លោកបានថ្លែងដូច្នេះ នៅក្នុងពិធីសម្ពោធរថយន្ត Tesla ចំនួន២ម៉ូដែលជាផ្លូវការគឺ Model 3 ដែលមានតម្លៃចន្លោះពី១,៧៥ ទៅ២,៣លានបាត និង Model Y ដែលមានតម្លៃចាប់ពី១,៩៥ទៅ២,៥លានបាត។
លោកបានបន្តថា “យើងជឿជាក់ថា វាជាសញ្ញាល្អ ដែលក្រុមហ៊ុន Tesla ដាក់លក់រថយន្តរបស់ខ្លួននៅក្នុងប្រទេសថៃ ហើយប្រទេសថៃគឺជាប្រទេសទី២ក្នុងតំបន់អាស៊ាន បន្ទាប់ពីប្រទេសសិង្ហបុរី ដែលក្រុមហ៊ុន Tesla បានដាក់លក់រថយន្តរបស់ខ្លួន”។
ក្រុមហ៊ុនផលិតរថយន្ត EV ដែលមានមូលដ្ឋាននៅរដ្ឋតិចសាស់មួយនេះ គ្រោងនាំចូលរថយន្តពីរោងចក្រដំឡើងរថយន្តរបស់ខ្លួន នៅក្នុងប្រទេសចិនទៅកាន់ប្រទេសថៃ ប៉ុន្តែក្រុមហ៊ុនTesla មិនមានគម្រោងវិនិយោគរថយន្តEV នៅប្រទេសថៃនោះទេ។
យោងតាម BoI បានឱ្យដឹងថា ក្រុមហ៊ុន Tesla មិនចូលរួមក្នុងកញ្ចប់លើកទឹកចិត្ត EV របស់រដ្ឋាភិបាលថៃ ដែលផ្តល់ការកាត់ពន្ធ និងឧបត្ថម្ភធន ដើម្បីលើកកម្ពស់ការផលិត និងការប្រើប្រាស់EV នៅឆ្នាំ២០២២និងឆ្នាំ២០២៣នោះទេ។
BoI ក៏បានដឹងថា ក្រុមហ៊ុន Tesla កំពុងពិភាក្សាជាមួយរដ្ឋាភិបាលឥណ្ឌូនេស៊ីអំពីលទ្ធភាព នៃការវិនិយោគនៅទីនោះ ខណៈប្រទេសឥណ្ឌូនេស៊ីមានការផ្គត់ផ្គង់ធាតុនីកែល ដ៏ច្រើនសន្ធឹកសន្ធាប់ ដែលជាសមាសធាតុសំខាន់នៅក្នុងការផលិតអាគុយលីចូម។
លោក Narit បានមានប្រសាសន៍បន្ថែមថា យើងត្រូវខិតខំប្រឹងប្រែងដើម្បីលើកទឹកចិត្តក្រុមហ៊ុន Tesla ឱ្យបោះទុនវិនិយោគនៅប្រទេសថៃ៕