ដោយ: លាងហួរ
ភ្នំពេញ: ក្រុមអ្នកជំនាញបាននិយាយថា សហរដ្ឋអាមេរិកមាននីតិវិធី និងច្បាប់តឹងរ៉ឹងមួយចំនួន សម្រាប់ការនាំចេញចំណីអាហារ ហើយកម្ពុជាមានសក្តានុពល ក្នុងការប្រើប្រាស់ទីផ្សារអាមេរិកដ៏ធំ សម្រាប់ការនាំចេញចំណីអាហាររបស់ខ្លួន។
សហរដ្ឋអាមេរិក គឺជាទីផ្សារដ៏ធំបំផុតសម្រាប់ប្រទេសកម្ពុជា ដែលរួមចំណែករហូតដល់៤៣ភាគរយ នៃទំហំនៃការនាំចេញសរុបរបស់កម្ពុជា ក្នុងអំឡុងខែមករា ដល់ខែកក្កដាក្នុងឆ្នាំ២០២២នេះ។
កាលពីឆ្នាំ២០២១ ទំហំនៃការនាំចូលរបស់សហរដ្ឋអាមេរិក ពីកម្ពុជាសម្រេចបាន៨,៧ពាន់លានដុល្លារ ហើយអាមេរិកគឺជាទីផ្សារនាំចេញដ៏ធំបំផុតរបស់កម្ពុជា។
ប្រភេទទំនិញនាំចេញកំពូលពីកម្ពុជា ទៅអាមេរិករួមមានសម្លៀកបំពាក់ ស្បែកជើង និងផលិតផលធ្វើដំណើរ។
ក្រុមអ្នកជំនាញកំពូលជឿជាក់ថា កម្ពុជាអាចបង្កើនការនាំចេញចំណីអាហាររបស់ខ្លួន ទៅកាន់សហរដ្ឋអាមេរិកនាពេលអនាគត ដើម្បីបង្កើនទីផ្សារ និងកំណើនសេដ្ឋកិច្ចរបស់ខ្លួន។
កាលពីថ្ងៃសៅរ៍ ទី០៣ ខែធ្នូកន្លងទៅសិក្ខាសាលាមួយ ត្រូវបានរៀបចំឡើងនៅសណ្ឋាគារសុខាភ្នំពេញប្រធានបទ “ការនាំចេញចំណីអាហារទៅកាន់សហរដ្ឋអាមេរិក”ដើម្បីពិនិត្យលើនីតិវិធីផ្សេងៗ នៃការនាំចេញអាហារទៅកាន់សហរដ្ឋអាមេរិក៕
