ដោយ: លាងហួរ
បាងកក: អាជ្ញាធរទេសចរណ៍ថៃ (TAT) បានឱ្យដឹងកាលពីថ្ងៃសុក្រ ទី០២ ខែធ្នូថា ប្រទេសថៃទទួលបានភ្ញៀវទេសចរបរទេសប្រហែល៩,៤លាននាក់ គិតចាប់ពីខែមករាដល់ខែវិច្ឆិកា ហើយតួលេខនេះ នឹងអាចឈានដល់១០,៥លាននាក់ សម្រាប់រយៈពេលពេញមួយឆ្នាំ។
អភិបាលអាជ្ញាធរទេសចរណ៍ថៃ លោក Yuthasak Supasorn បានប្រាប់សារពត៌មានរ៉យទ័រថា បច្ចុប្បន្ននេះ ប្រទេសថៃកំពុងទទួលបានភ្ញៀវទេសចរបរទេសចន្លោះពី៥០.០០០នាក់ ទៅដល់៦០.០០០នាក់ក្នុងមួយថ្ងៃ ក្នុងរដូវកាលដែលមានភ្ញៀវទេសចរច្រើននេះ។
លោកបានបន្តថា “គិតរហូតមកដល់ពេលនេះ ប្រទេសម៉ាឡេស៊ីជាទីផ្សារទេសចរណ៍ ដ៏ធំបំផុតរបស់ប្រទេសថៃ ដោយភ្ញៀវទេសចរម៉ាឡេស៊ីមាន១,៥លាននាក់”។
លោកបានបន្ថែមថា យើងកំពុងមើលឃើញបម្រែបម្រួល នៃចំនួនភ្ញៀវទេសចរផ្លូវឆ្ងាយ ដូច ជាជនជាតិរុស្សីកាន់តែច្រើន ដែលចូលមកប្រទេសថៃដើម្បីគេចពីអាកាសធាតុត្រជាក់ក្នុងប្រទេសរបស់ពួកគេ។
លោក Yuthasak បានឱ្យដឹងថា ខណៈប្រទេសរុស្ស៊ី មិនទាន់ស្ថិតក្នុងទីផ្សារទេសចរណ៍កំពូលទាំង៥នៅឡើយ ប៉ុន្តែចំនួនភ្ញៀវទេសចររុស្ស៊ីបានកើនឡើងចាប់តាំងពីខែតុលា នៅពេលដែលមានជើងហោះហើរត្រង់ពីទីក្រុងបាងកក ទៅកាន់ភូកេត។
នៅមុនពេលមានជំងឺរាតត្បាតកូវីដ១៩ ប្រទេសរុស្ស៊ីបានស្ថិតក្នុងទីផ្សារទេសចរណ៍ លំដាប់កំពូលទាំង៥របស់ប្រទេសថៃ ដោយភ្ញៀវទេសចររុស្ស៊ីជិត២លាននាក់ បានហូរចូលមកប្រទេសថៃក្នុងមួយឆ្នាំ។
ការងើបឡើងវិញនៃវិស័យទេសចរណ៍ ដែលរួមចំណែកប្រហែល១៨ភាគរយ នៃផលិតផលក្នុងស្រុកសរុបដោយផ្ទាល់ និងដោយប្រយោល ត្រូវបានគេមើលឃើញថា ជាកត្តាជំរុញដ៏សំខាន់ នៃកំណើនសេដ្ឋកិច្ចរបស់ប្រទេសថៃ។
ធនាគារកណ្តាលថៃបានព្យាករណ៍ថា ប្រទេសរបស់ខ្លួននឹងទទួលបានភ្ញៀវបរទេសចំនួន១០,៥លាននាក់ នៅក្នុងឆ្នាំ២០២២នេះ និង២២លាននាក់ទៀតនៅឆ្នាំ២០២៣ ព្រមទាំង៣៤លាននាក់នៅឆ្នាំ២០២៤៕
