ដោយៈ គង់ ម៉ាលីនណា
ភ្នំពេញៈ យោងតាមលទ្ធផល នៃការគណនារបស់អ្នកជំនាញក្រសួងផែនការបានបង្ហាញថា ទំហំសេដ្ឋកិច្ចខេត្តខេត្ត មានប្រមាណ ២១៨,៥៣២ លានរៀល គិតជាដុល្លាប្រហែល៥៤លានដុល្លា បើគិតតាមថ្លៃបច្ចុប្បន្ន នៅឆ្នាំ២០២១ ស្មើ ០.២% នៃសេដ្ឋកិច្ចជាតិ។
របាយការណ៍ដដែលបានឲ្យដឹងទៀតថា សេដ្ឋកិច្ចខេត្ត មានកំណើន ០.៣% នៅឆ្នាំ២០២១ ធៀបនឹងឆ្នាំ២០២០ ចំណូលសម្រាប់មនុស្សម្នាក់ ១,២០៦$ នៅឆ្នាំ២០២១ និង១,២១៨$ នៅឆ្នាំ២០២០។
ព៌តមាននេះ ត្រូវបានបង្ហើបឲ្យដឹងដោយលោករិន វីរៈរដ្ឋលេខាធិការក្រសួងផែនការ នៅក្នុងពិធីប្រកាសផ្សព្វផ្សាយផលិតផល ក្នុងស្រុកសរុប(GDP) និងសន្ទស្សន៍ថ្លៃទំនិញប្រើប្រាស់(CPI)សម្រាប់ខេត្តកែបកាលពីថ្ងៃទី១ ធ្នូកន្លងមកនេះ។
ក្រសួងផែនការ បានសហការជាមួយមន្ទីរផែនការខេត្ត ក្រោមការសម្រសម្រួលដោយ រដ្ឋបាលខេត្ត កែប បានរៀបចំពិធីប្រកាសផ្សព្វផ្សាយផលិតផលក្នុងស្រុកសរុប(GDP) និងសន្ទស្សន៍ថ្លៃទំនិញប្រើប្រាស់(CPI)សម្រាប់ខេត្ត ក្រោមអធិបតីភាពលោករិន វីរៈ រដ្ឋលេខាធិការប្រចាំការ តំណាងដ៏ខ្ពង់ខ្ពស់ឯកឧត្តមកិត្តិសេដ្ឋាបណ្ឌិត ឆាយ ថន ទេសរដ្ឋមន្រ្តីរដ្ឋមន្រ្តីក្រសួងផែនការ។
លោកបណ្ឌិត សោម ពិសិដ្ឋ អភិបាលនៃគណៈអភិបាលខេត្ត ព្រមជាមួយនេះ ក៏បានការអញ្ជើញចូលរួមជាគណៈអធិបតីពី លោកជំទាវ សមាជិកាក្រុមប្រឹក្សាខេត្ត លោកអភិបាលរងខេត្ត លោក លោកស្រីប្រធានមន្ទីរ ក្រុមប្រឹក្សា អភិបាលក្រុង ស្រុក និងមន្រ្តីជំនាញពាក់ព័ន្ធជុំវិញខេត្តផងដែរ។
បណ្ឌិតសោម ពិសិដ្ឋបានគូសបញ្ជាក់ថា លទ្ធផលផលិតផលក្នុងស្រុកសរុប(GDP) និងសន្ទស្សន៍ថ្លៃទំនិញប្រើប្រាស់(CPI)សម្រាប់ខេត្ត គឺមានសារសំខាន់ណាស់ សម្រាប់កិច្ចអភិវឌ្ឍន៍ និងវាយតម្លៃពីការរីកចម្រើនសេដ្ឋកិច្ចខេត្ត។ លោកបន្តថា តាមរយៈទិន្នន័យនេះ យើងនឹងដឹងពីទំហំសេដ្ឋកិច្ចរបស់ខេត្ត ចំណូលជាមធ្យមរបស់មនុស្សម្នាក់ៗ អត្រាអតិផរណាក្នុងខេត្ត និងរៀបចំគោលនយោបាយអភិវឌ្ឍន៍ផ្សេងៗ ក្នុងការអភិវឌ្ឍន៍សេដ្ឋកិច្ចខេត្តឱ្យទទួលបានលទ្ធផលល្អប្រសើរ និងចំគោលដៅ។
លោករិន វីរៈ រដ្ឋលេខាធិការប្រចាំការ បានលើកឡើងថា ខេត្តកែបជាខេត្តមួយ ដែលមានសក្ដានុពលលើវិស័យទេសចរណ៍ វិស័យកសិកម្ម និងវិស័យសិប្បកម្ម ដែលធ្វើឲ្យខេត្តមានការរីកចំរើន និងការអភិវឌ្ឍន៍៕
