ដោយ: លាងហួរ
កំពត: រដ្ឋបាលខេត្តកំពត បានបង្ហាញពីផែនការរបស់ខ្លួន ក្នុងការចុះបញ្ជីផលិតផលចំនួន២៦បន្ថែមទៀត ក្រោមគម្រោងភូមិមួយផលិតផលមួយ (OVOP) បន្ថែមលើផលិតផលដែលបានចុះបញ្ជីស្រាប់ចំនួន២១។
កាលពីថ្ងៃព្រហស្បតិ៍ម្សិលមិញនេះ កិច្ចប្រជុំមួយបានរៀបចំឡើងនៅសាលាខេត្តកំពត ដើម្បីពិនិត្យលើគោលនយោបាយជាតិ ពាក់កណ្តាលអា ណត្តិស្តីពីការលើកកម្ពស់ គម្រោងភូមិមួយផលិតផលមួយ(OVOP)សម្រា ប់ឆ្នាំ២០១៦-២០២៦ ដោយកិច្ចប្រជុំនេះ បានផ្តោតលើការផ្សព្វផ្សាយផលិតផលក្នុងស្រុក។
អភិបាលរងខេត្តកំពត លោកពេញ ធាមបានមានប្រសាសន៍ថា ការងារជំរុញចលនា OVOP ក្នុងខេត្តកំពុងដំណើរការយ៉ាងល្អប្រសើរ និងទទួលបានលទ្ធផលគួរជាទីមោទនៈ។ រដ្ឋបាលខេត្តកំពតតែងតែដាស់តឿនដល់លេខាធិការដ្ឋាន ក៏ដូចជាអាជ្ញាធរ និងមន្ទីរពាក់ព័ន្ធ ត្រូវរួមគ្នាជំរុញចលនានេះ។
លោកអភិបាលរងរូបនេះបានបញ្ជាក់ថា ក្នុងរយៈពេល៥ឆ្នាំនៃការអនុវត្តចលនាភូមិមួយផលិតផលមួយ ក្នុងខេត្តកំពតបានចុះបញ្ជីផលិតផលចំនួន២១ហើយបច្ចុប្បន្ននេះ រដ្ឋបាលខេត្តកំពុងរៀបចំផលិតផលចំនួន២៦មុខបន្ថែមទៀតដើម្បីដាក់បញ្ចូល៕
