ដោយ: លាងហួរ
ប៉េកាំង: ក្រសួងពាណិជ្ជកម្មចិន បានប្រកាសកាលពីថ្ងៃព្រហស្បតិ៍ ទី០១ ខែធ្នូថា ប្រទេសចិនប្រឆាំងនឹងការហាមឃាត់ ពីសំណាក់គណៈកម្មការទំនាក់ទំនងសហព័ន្ធអាមេរិក លើការនាំចូលឧបករណ៍ទូរគមនាគមន៍ថ្មីរបស់ខ្លួន។
នេះបើយោងតាមការចេញផ្សាយ ដោយសារពត៌មានរ៉យទ័រ កាលពីថ្ងៃទី០១ ខែវិច្ឆិកា ឆ្នាំ២០២២។
ដើម្បីឆ្លើយតបទៅនឹងបញ្ហានេះ ទីក្រុងប៉េកាំងបានប្តេជ្ញាថា នឹងអនុម័តវិធានការចាំបាច់ ដើម្បីការពារសិទ្ធិរបស់ក្រុមហ៊ុនក្នុងស្រុករបស់ខ្លួន។
រដ្ឋបាលសហរដ្ឋអាមេរិក របស់លោកចូ បៃដិន បានហាមឃាត់លើការលក់ ឬការនាំចូលឧបករណ៍ទូរគមនាគមន៍ថ្មីពីក្រុមហ៊ុន Huawei Technologies និងក្រុមហ៊ុន ZTE របស់ប្រទេសចិន ដោយសហរដ្ឋអាមេរិក ដោយបានលើកឡើងពីហានិភ័យនៃសន្តិសុខជាតិរបស់ខ្លួន។
អ្នកនាំពាក្យរបស់ក្រសួងពាណិជ្ជកម្មចិន លោកស្រី Shu Jueting បានមានប្រសាសន៍ក្នុងសន្និសីទសារព័ត៌មានមួយថា ប្រទេសចិននឹងអនុម័តវិធានការចាំបាច់ ដើម្បីការពារសិទ្ធិស្របច្បាប់របស់ក្រុមហ៊ុន ក្នុងស្រុក ដោយជំរុញឱ្យសហរដ្ឋអាមេរិកកែកំហុស និងបញ្ឈប់ការបង្កឱ្យបញ្ហាសេដ្ឋកិច្ច និងពាណិជ្ជកម្មក្លាយជារឿងនយោបាយ។
ចំណាត់ការរបស់គណៈកម្មការទំនាក់ទំនង សហព័ន្ធរបស់សហរដ្ឋអាមេរិក តំណាងឱ្យការបង្រ្កាបដ៏ថ្មីបង្អស់ របស់ទីក្រុងវ៉ាស៊ីនតោនលើក្រុមហ៊ុនបច្ចេកវិទ្យាខ្នាតយក្សរបស់ប្រទេសចិន ស្របពេលមានការភ័យខ្លាចថា ទីក្រុងប៉េកាំង អាចប្រើប្រាស់បច្ចេកវិទ្យាទាំងនោះ ដើម្បីធ្វើចារកម្មលើជនជាតិអាមេរិក។
ចំណែកក្រុមហ៊ុន Huawei និងក្រុមហ៊ុន ZTE បានបដិសេធចំពោះ ការចោទប្រកាន់ របស់រដ្ឋាភិបាលក្រុងវ៉ាស៊ីនតោនថា ខ្លួនអាចឈ្លបយកការណ៍លើអតិថិជនរបស់សហរដ្ឋអាមេរិក និងបង្កការគំរាមកំហែងដល់សន្តិសុខជាតិរបស់អាមេរិក។
កាលពីខែមីនា ឆ្នាំ២០២១ ទីក្រុងវ៉ាស៊ីនតោនបានដាក់បញ្ចូលក្រុមហ៊ុនចិនចំនួន៥ទៅក្នុងបញ្ជីខ្មៅ រួមមានក្រុមហ៊ុនHuawei ក្រុមហ៊ុនZTE ក្រុមហ៊ុនទូរគមនាគមន៍ Hytera Communications Corp ក្រុមហ៊ុនឃ្លាំមើលវីដេអូ Hikvision និងក្រុមហ៊ុនផលិតឧបករណ៍ឃ្លាំមើល Dahua ៕