ដោយ: លាងហួរ
វ៉ាស៊ីនតោន: ប្រធានធនាគារពិភពលោកលោក David Malpass បានមានប្រសាសន៍ កាលពីថ្ងៃព្រហស្បតិ៍ម្សិលមិញនេះថា បច្ចុប្បន្ននេះ បណ្តាប្រទេសក្រីក្របំផុត នៅលើពិភពលោកជំពាក់បំណុលប្រចាំឆ្នាំក្នុងទំហំទឹកប្រាក់រហូតដល់៦២ពាន់លានដុល្លារ ដល់ម្ចាស់បំណុលទ្វេរភាគី ពោលគឺកើនឡើង៣៥ភាគរយធៀបនឹងឆ្នាំ២០២១។
លោក Malpass បានប្រាប់សន្និសីទកាសែត Reuters NEXTនៅទីក្រុងញូវយ៉កថា បច្ចុប្បន្ននេះ ពីរភាគបីនៃបន្ទុកបំណុលទាំងនោះ គឺជំពាក់ប្រទេសចិន។
លោក Malpass ក៏បានមានប្រសាសន៍ផងដែរថា លោកមានការព្រួយបារម្ភអំពីការកើនឡើង នៃបំណុលនៅក្នុងប្រទេស ដែលមានសេដ្ឋកិច្ចជឿនលឿន ដូចជា សហរដ្ឋអាមេរិក ពីព្រោះបញ្ហានេះ កំពុងទាញដើមទុនកាន់តែច្រើនចេញពីប្រទេសកំពុងអភិវឌ្ឍន៍។
ដូច្នេះហើយ នៅពេលដែលអត្រាការប្រាក់កើនឡើង សេវាបំណុលក៏កើនឡើងសម្រាប់ប្រទេស ដែលមានសេដ្ឋកិច្ចជឿនលឿន ហើយវានឹងត្រូវការដើមទុនយ៉ាងច្រើនពីពិភពលោក។
លោក Malpass បានបន្ថែមថា លោកនឹងចូលរួមកិច្ចប្រជុំ នៅប្រទេសចិនក្នុងសប្តាហ៍ក្រោយ ជាមួយប្រធានស្ថាប័នអន្តរជាតិ និងអាជ្ញាធរចិន ដើម្បីពិភាក្សាអំពីវិធីសាស្រ្ត ក្នុងការបន្ធូរបន្ថយបំណុល សម្រាប់ប្រទេសក្រីក្រ គោលនយោបាយកូវីដ១៩ ភាពចលាចលក្នុងវិស័យអចលនទ្រព្យ និងបញ្ហាសេដ្ឋកិច្ចផ្សេងទៀត។
លោកស្រី Kristalina Georgieva ប្រធានមូលនិធិរូបិយវត្ថុអន្តរជាតិ(IMF) ក៏គ្រោងចូលរួមក្នុងកិច្ចប្រជុំនេះផងដែរ ដោយលោកស្រីនឹងផ្តោតយ៉ាងខ្លាំងលើវិធីដោះស្រាយបំណុល។
នៅក្នុងចំណោមអ្នកចូលរួមទាំងអស់ នឹងមានមន្ត្រីមកពីធនាគារអភិវឌ្ឍន៍ប្រទេសចិន និងធនាគារនាំចេញ -នាំចូលរបស់ប្រទេសចិន ដែលជាអ្នកផ្តល់កម្ចីទ្វេរភាគីដ៏សំខាន់ពីររបស់ប្រទេសនេះ៕