ដោយ: លាងហួរ
ម៉ូស្គូ: រដ្ឋមន្ត្រីការពារជាតិរុស្ស៊ីលោក Sergei Shoigu បានមានប្រសាសន៍កាលពីថ្ងៃពុធម្សិលមិញនេះថា ប្រទេសរុស្ស៊ីនឹងយកចិត្តទុកដាក់ជាពិសេស ក្នុងការកសាងហេដ្ឋារចនាសម្ព័ន្ធ សម្រាប់កងកម្លាំងនុយក្លេអ៊ែររបស់ខ្លួននៅឆ្នាំ២០២៣ខាងមុខ។
លោក Shoigu បានអត្ថាធិប្បាយតាមទូរទស្សន៍ថា រុស្ស៊ីក៏នឹងធ្វើការដើម្បីធ្វើឱ្យប្រសើរឡើង នូវសមត្ថភាពប្រយុទ្ធរបស់កងកម្លាំងមីស៊ីលរបស់ខ្លួន ហើយសម្ភារៈបរិក្ខារនានាកំពុងត្រូវបានសាងសង់ ដើម្បីបំពាក់ប្រព័ន្ធមីស៊ីលថ្មី។ រុស្ស៊ីមានឃ្លាំងអាវុធនុយក្លេអ៊ែរ ធំជាងគេក្នុងពិភពលោក ដោយមានក្បាលគ្រាប់ជិត៦.០០០គ្រាប់។
ប្រធានាធិបតីរុស្ស៊ី លោក វ្ល៉ាឌីមៀ ពូទីន បានដាក់បញ្ចូលទឹកដីដែលរុស្ស៊ី បានឈ្លានពានពីអ៊ុយក្រែន នៅក្រោមឆ័ត្រនុយក្លេអ៊ែររបស់ទីក្រុងមូស្គូ ដោយព្រមានថា លោកត្រៀមខ្លួនរួចជាស្រេច ដើម្បីការពារបូរណភាពទឹកដីរបស់រុស្ស៊ី តាមគ្រប់មធ្យោបាយ ដែលមានចំណែកសហរដ្ឋអាមេរិកបានព្រមានរុស្ស៊ីអំពីផលវិបាក នៃការប្រើប្រាស់អាវុធនុយក្លេអ៊ែរផងដែរ។
ប្រទេសរុស្ស៊ី និងសហរដ្ឋអាមេរិកគ្រោងនឹងជួបពិភាក្សាគ្នា នៅទីក្រុងគែរក្នុងសប្តាហ៍នេះ ស្តីពីសន្ធិសញ្ញាមានស្រាប់ New START ដែលកំណត់ចំនួនក្បាលគ្រាប់អាចដាក់ពង្រាយបាន។
ទោះជាយ៉ាងណាក្តីទីក្រុងម៉ូស្គូ បានដកខ្លួនចេញនៅមុនថ្ងៃនៃកិច្ចប្រជុំ ដោយចោទប្រកាន់សហរដ្ឋអាមេរិក ពីអាកប្បកិរិយាប្រឆាំងរុស្ស៊ី និងព្យាយាមរៀបចំសន្ធិសញ្ញា ដើម្បីផលប្រយោជន៍របស់ខ្លួន៕
