ដោយ: លាងហួរ
ភ្នំពេញ: រដ្ឋសភាកម្ពុជាកាលពីថ្ងៃអង្គារទី២៩ ខែវិច្ឆិកា បានអនុម័តលើសេចក្តីព្រាងច្បាប់ថវិកា ចំនួន៩,៦៤ពាន់លានដុល្លារអាមេរិក សម្រាប់ការចំណាយរបស់រដ្ឋាភិបាលក្នុងឆ្នាំ២០២៣ ពោលគឺកើនឡើង១៣ភាគរយពីប្រមាណ៨,៥ ពាន់លានដុល្លារក្នុងឆ្នាំ២០២២នេះ។
សមាជិកសភាចំនួន៨៩រូប ដែលមានវត្តមាននៅក្នុងសម័យប្រជុំសភា បានអនុម័តជាឯកច្ឆ័ន្ទលើសេចក្តីព្រាងច្បាប់នេះ។
ថ្លែងក្នុងសម័យប្រជុំនេះ លោកឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា ថវិកានេះមានចំនួនស្មើនឹង២៩,៨៧ភាគរយ នៃផលិតផលក្នុងស្រុកសរុប(GDP)របស់កម្ពុជា។
លោកបន្តថា “ថវិកាដែលបានស្នើឡើងនេះ គឺត្រូវធានាជោគជ័យនៃការបោះឆ្នោតសកល និងការរៀបចំប្រកួតកីឡាស៊ីហ្គេមលើកទី៣២ នៅក្នុងឆ្នាំ២០២៣ខាងមុខដែលកម្ពុជានឹងធ្វើជាម្ចាស់ផ្ទះ”។
លោកអូន ព័ន្ធមុនីរ័ត្ន ដែលជាឧបនាយករដ្ឋមន្ត្រីផងដែរនោះបានមានប្រសាសន៍ថា សេដ្ឋកិច្ចរបស់កម្ពុជាត្រូវបានព្យាករណ៍ថា នឹងកើនឡើង៦,៦ភាគរយនៅឆ្នាំ២០២៣ ធៀបនឹង៥,៤ភាគរយនៅក្នុងឆ្នាំ២០២២នេះ។
យោងតាមសេចក្តីព្រាងច្បាប់ថវិកាបានឱ្យដឹងថា ដើម្បីឆ្លើយតបនឹងការចំណាយ រដ្ឋាភិបាលត្រូវបានគេរំពឹងថា នឹងបង្កើតប្រាក់ចំណូលសរុបបានចំនួន៧,២១ពាន់លានដុល្លារនៅឆ្នាំក្រោយ ពោលគឺកើនឡើង១៤,៥ភាគរយធៀបនឹងឆ្នាំ២០២២នេះ។
រដ្ឋាភិបាលក៏មានគម្រោងខ្ចី ប្រាក់បន្ថែមចំនួន១,៧ពាន់លានSDR សិទ្ធិដកប្រាក់ពិសេស (Special Drawing Rights) ឬស្មើជិត២,២ពាន់លានដុល្លារពីបណ្តាប្រទេសជាមិត្ត និងដៃគូអភិវឌ្ឍន៍ នានា។លើសពីនេះ រដ្ឋាភិបាលគ្រោងបង្កើនថវិកាបន្ថែមទៀត ពីការបោះផ្សាយមូលបត្របំណុលរបស់ខ្លួន។
លោកឈាង វុន ប្រធានគណៈកម្មាធិការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា បានមានប្រសាសន៍ថា ថវិកានៅឆ្នាំក្រោយនេះ នឹងត្រូវចំណាយលើការគ្រប់គ្រងទូទៅ វិស័យសុខភាពសាធារណៈ វិស័យអប់រំ វិស័យជំរុញសេដ្ឋកិច្ច វិស័យសង្គមកិច្ច វិស័យការពារជាតិ វិស័យសន្តិសុខ សណ្តាប់ធ្នាប់សាធារណៈនិងវិស័យផ្សេងទៀត។
សេចក្តីព្រាងច្បាប់នេះ នឹងត្រូវពិនិត្យជាចុងក្រោយ ដោយព្រឹទ្ធសភារបស់ប្រទេសកម្ពុជា មុននឹងថ្វាយទៅដល់ព្រះមហាក្សត្រដើម្បីអនុម័ត៕
