ដោយ: លាងហួរ
ហាណូយ: ក្រុមសេដ្ឋវិទូក្នុងស្រុកបាននិយាយថា ការប្រណាំងប្រជែងលើបន្ទះឈីបសកលកំពុងឡើងកំដៅ ហើយប្រទេសវៀតណាមគួរតែបង្កើនជំហររបស់ខ្លួន ក្នុងផលិតកម្មបន្ទះអេឡិចត្រូនិក semiconductorសកល ខណៈក្រុមហ៊ុនឈានមុខគេមួយចំនួន កំពុងវិនិយោគលើការផលិតបន្ទះឈីបនៅក្នុងប្រទេសនេះ។
លោកសាស្ត្រាចារ្យ ង្វៀន ម៉ី ប្រធានសមាគមនៃសហគ្រាសវិនិយោគបរទេសវៀតណាម(VAFIE) បានមានប្រសាសន៍ថា ផលប៉ះពាល់អវិជ្ជមាននៃជំងឺរាតត្បាតកូវីដ១៩ និងជម្លោះពាណិជ្ជកម្ម ដ៏អូសបន្លាយបានបណ្តាលឱ្យមានការរំខាន ដល់ការផ្គត់ផ្គង់បន្ទះអេឡិចត្រូនិកsemiconductor ។
លោកបានបន្តថា បណ្តាក្រុមហ៊ុនសកលជាច្រើន ដែលប្រើប្រាស់បន្ទះអេឡិចត្រូនិក ដើម្បីបង្កើតស្មាតហ្វូន យានយន្តបើកបរដោយខ្លួនឯង បច្ចេកវិទ្យាបញ្ញាសិប្បនិម្មិត (AI) ឬមជ្ឈមណ្ឌលទិន្នន័យបានបង្ខំចិត្ត ដើម្បីកាត់បន្ថយផលិតភាពរបស់ពួកគេ។
លោកសាស្ត្រចារ្យសង្កត់ធ្ងន់ថា “បណ្តាប្រទេសនានាកំពុងប្រជែងគ្នាផលិតបន្ទះអេឡិចត្រូនិក និងបន្ទះឈីប។ ជាពិសេសក្រសួងពាណិជ្ជកម្មអាមេរិក (DOC) បានចេញផ្សាយយុទ្ធសាស្រ្តរបស់ខ្លួន សម្រាប់ការអនុវត្តកម្មវិធី CHIPS ចំនួន៥០ពាន់លានដុល្លារអាមេរិក”។ លោកបន្តថា “ប្រទេសចិនបានបង្កើនការចំណាយរបស់ខ្លួនទ្វេដង និងបានអនុម័តគោលនយោបាយ ដើម្បីគាំទ្រដល់បណ្តាក្រុមហ៊ុនផលិតបន្ទះអេឡិចត្រូនិក”។
ប្រទេសវៀតណាម ក៏បានក្លាយជាមជ្ឈមណ្ឌល នៃឧស្សាហកម្មបន្ទះអេឡិចត្រូនិកsemiconductor ខណៈក្រុមហ៊ុន Samsung បានប្រកាសពីផែនការបោះទុនវិនិយោគ បន្ថែមចំនួន៩២០លានដុល្លារ ក្នុងការផលិត បន្ទះអេឡិចត្រូនិក semiconductor ចាប់ពីខែកក្កដា ឆ្នាំ២០២៣។
ប្រទេសវៀតណាមក៏ជាមជ្ឈមណ្ឌលប្រមូលផ្តុំ និងរោងចក្រសាកល្បងដ៏ធំបំផុតរបស់ក្រុមហ៊ុន Intel ក្រោមទុនវិនិយោគចំនួន១,៥ពាន់លានដុល្លារ។
លោក Đỗ Nhất Hoàng ប្រធានទីភ្នាក់ងារវិនិយោគបរទេសរបស់ក្រសួងផែនការ និងវិនិយោគ បានមានប្រសាសន៍ថា ក្រុមហ៊ុន Synopsys មកពីសហរដ្ឋអាមេរិក ក៏បានប្រកាសថាខ្លួននឹងជួយបណ្តុះបណ្តាលវិស្វករអគ្គិសនីនៅក្នុងប្រទេសវៀតណាម និងគាំទ្រដល់សួនឧស្សាហកម្មបច្ចេកវិទ្យា HCM City Hi-Tech Park (SHTP) ដើម្បីបង្កើតមជ្ឈមណ្ឌលរចនាបន្ទះឈីបផងដែរ។
លោក Hoàng បានបន្ថែមថា ក្នុងរយៈពេល១០ខែដំបូងនៃឆ្នាំនេះ លំហូរ FDI ចូលប្រទេសវៀតណាមហក់ឡើង ដល់១៧,៤៥ពាន់លានដុល្លារ ពោលគឺកើនឡើង១៥,២ភាគរយ ធៀបនឹងរយៈពេលដូចគ្នាក្នុងឆ្នាំ២០២១៕
