ដោយៈ ម៉ាលីនណា
បាងកកៈ មន្រ្តីជាន់ខ្ពស់ក្រសួងសាធាណៈការ និងដឹកជញ្ជូន និងក្រសួងពាក់ព័ន្ឋពីប្រទេសចំនួន៨ បានអញ្ជើញចូលរួមក្នុងកិច្ចកម្រិតខ្ពស់ ក្រោមប្រធានបទ “ការប្រមើលមើលឡើងវិញ លើវិស័យដឹកជញ្ជូននាពេលអនាគតក្នុងតំបន់អាស៊ី”។
កិច្ចប្រជុំពិគ្រោះយោបល់កម្រិតតំបន់លើកទី១ នៅក្នុងតំបន់អាស៊ីរបស់វេទិកាដឹកជញ្ជូនអន្តរជាតិនេះ រៀបចំឡើងនៅទីក្រុងបាងកកប្រទេសថៃ ខណៈថ្នាក់ដឹកនាំកម្ពុជាបានអះអាងថា ការគិតគូរទុកជាមុន អាចជួយរៀបចំឱ្យសង្គមកម្ពុជា មានលទ្ធភាពក្នុងការដោះស្រាយបញ្ហា ប្រឈមនានានាពេលអនាគត។
កិច្ចប្រជុំនេះ មានការចូលរួមពីអង្គការ សម្រាប់កិច្ចសហប្រតិបត្តិការសេដ្ឋកិច្ច និងការអភិវឌ្ឍន៍ (OECD) គណៈកម្មការសេដ្ឋកិច្ច និងសង្គមសម្រាប់អាស៊ី និងប៉ាស៊ីហ្វិករបស់អង្គការសហប្រជាជាតិ (UN-ESCAP) មូលនិធិសុវត្ថិភាពផ្លូវថ្នល់ របស់អង្គការសហប្រជាជាតិ(UN Road Safety Fund) ធនាគារអភិវឌ្ឍន៍អាស៊ី ADB ធនាគារពិភពលោក សហគមន៍អាល្លឺម៉ង់សម្រាប់កិច្ចសហប្រតិបត្តិការអន្តរជាតិ GIZ លេខាធិការដ្ឋានសមាគមអាស៊ាន និងប្រទេសជាសមាជិករបស់វេទិកាដឹកជញ្ជូនអន្តរជាតិ (ITF) នៅក្នុងតំបន់អាស៊ីផងដែរ។
កិច្ចប្រជុំពិគ្រោះយោបល់នេះ ធ្វើឡើងដើម្បីកំណត់នូវឱកាស និងសកម្មភាពជាក់ស្តែងនៅតំបន់អាស៊ី ដែលនឹងនាំដល់ការដឹកជញ្ជូនប្រកបដោយនិរន្តរភាព ភាពធន់ និងបរិយាប័ន្ន។ កិច្ចប្រជុំនេះផ្តោតសំខាន់លើការចែករំលែកគោលនយោបាយអាទិភាព ចំណេះដឹង ការអនុវត្តល្អៗ និងវិធានការប្រកបដោយប្រសិទ្ធភាព ដើម្បីពន្លឿនការផ្លាស់ប្តូរក្នុងបរិបទនៃការរាតត្បាតកូវីដ១៩ ពិសេសក្នុងតំបន់អាស៊ីអាគ្នេយ៍ ដែលគ្របដណ្តប់លើប្រធានបទពាក់ព័ន្ធខ្ពស់សម្រាប់តំបន់ រួមមាន ដូចជា ការតភ្ជាប់វិស័យដឹកជញ្ជូន ការដឹកជញ្ជូនប្រកបដោយបរិយាប័ន្ន សុវត្ថិភាពនៃការដឹកជញ្ជូន (ការដឹកជញ្ជូនដែលបំភាយឧស្ម័នកាបូនទាប) និងការធ្វើទំនើបកម្មឌីជីថលលើវិស័យដឹកជញ្ជូន។
លោកស៊ុន ចាន់ថុលបានមានប្រសាសន៍ក្នុងកិច្ចប្រជុំនោះថា ការគិតគូរទុកជាមុន អាចជួយរៀបចំសង្គមយើង ឱ្យមានលទ្ធភាពក្នុងការដោះស្រាយបញ្ហាប្រឈមនានា ដែលអាចនឹងកើតមានឡើង នាពេលអនាគតបាន។ លោកចាត់ទុកថា លទ្ធផលនៃការពិភាក្សាគ្នានេះនឹងត្រូវបានយកទៅអនុវត្តន៍ ដើម្បីបន្តទៅកាន់កិច្ចប្រជុំកំពូលរបស់វេទិកា ដឹកជញ្ជូនអន្តរជាតិ (ITF) នាឆ្នាំ ២០២៣ ដែលជាសម័យប្រជុំលើកទី៧ របស់ (UN-ESCAP)។
លោកបញ្ជាក់ថា “វិស័យដឹកជញ្ជូន និងភ័ស្តុភារកម្មដែលមានលក្ខណៈប្រទាក់ក្រឡាគ្នា គឺកាន់តែមានសារៈសំខាន់ថែមទៀត សម្រាប់ការអភិវឌ្ឍសង្គម និងសេដ្ឋកិច្ចនៃប្រទេសនានានៅទូទាំងអាស៊ី និងប៉ាស៊ីហ្វិកក្នុងពេលប៉ុន្មានឆ្នាំខាងមុខ”។ លោកបន្តថា “ហេដ្ឋារចនាសម្ព័ន្ធដឹកជញ្ជូននានា គឺជាកត្តាជំរុញដ៏សំខាន់មួយសម្រាប់ការអភិវឌ្ឍ និងជាកត្តាជំរុញឱ្យមានកំណើនសេដ្ឋកិច្ចជាវិជ្ជមាន ក៏ដូចជារឹតបន្តឹងបរិយាប័ន្នសង្គម”៕