តម្លៃប្រេងឆៅសកលត្រូវគេរំពឹងថានឹងបន្តធ្លាក់ចុះនៅឆ្នាំ២០២៣ខាងមុខ

ដោយ: លាងហួរ

បាងកក: យោងតាមក្រុមអ្នកវិភាគនៃក្រុមហ៊ុនប្រេង និងឧស្ម័នជាតិ PTT Plc បានឱ្យដឹងថា តម្លៃប្រេងឆៅសកលត្រូវបានគេរំពឹងថា នឹងបន្តធ្លាក់ចុះមកនៅត្រឹម៨៥ ទៅ៩៥ដុល្លារអាមេរិក ក្នុងមួយបារ៉ែលនៅឆ្នាំ២០២៣ខាងមុខ នៅពេលដែលសេដ្ឋកិច្ចពិភពលោកធ្លាក់ចុះ។

ការប៉ាន់ប្រមាណនេះធ្វើឡើង ស្របពេលដែលធនាគារពិភពលោកបានព្រមាន ពីការធ្លាក់ចុះនៃសេដ្ឋកិច្ចសកល នៅឆ្នាំ២០២៣ បន្ទាប់ពីបណ្តាធនាគារកណ្តាលបានដំឡើងអត្រាការប្រាក់ ជាការឆ្លើយតបទៅនឹងអត្រាអតិផរណាដ៏ខ្ពស់។

លោក Nitipat Saengdaochai អ្នកវិភាគនៃក្រុមហ៊ុន PTT Prism បានថ្លែងនៅក្នុងវេទិកាទស្សនវិស័យប្រេងប្រចាំឆ្នាំលើកទី១១ថា ការផ្គត់ផ្គង់ប្រេងនឹងលើសពីតម្រូវការនៅឆ្នាំក្រោយ ប៉ុន្តែតម្លៃប្រេងពិភពលោកនៅតែប្រែប្រួល ហើយអាចហក់ឡើងវិញគ្រប់ពេលវេលា ប្រសិនបើការផ្គត់ផ្គង់ត្រូវបានរំខានម្តងទៀត។

PTT Prism គឺជាអង្គភាពមួយក្រោមក្រុមហ៊ុន PTT Group ដែលរួមមានអ្នកជំនាញនៅទូទាំងអាជីវកម្មថាមពល PTT ។ នៅក្នុងត្រីមាសទីពីរនៃឆ្នាំ២០២២នេះ តម្លៃប្រេងពិភពលោកបានកើនឡើងលើស១០០ដុល្លារ ក្នុងមួយបារ៉ែល បន្ទាប់ពីមានការព្រួយបារម្ភលើការរំខានការផ្គត់ផ្គង់ប្រេង ដែលជាលទ្ធផលនៃសង្រ្គាមរុស្ស៊ី និងអ៊ុយក្រែន។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

លោក Sirawish Somrattanakul អ្នកវិភាគនៅក្រុមហ៊ុន PTT Prism បានមានប្រសាសន៍ថា ទីផ្សារប្រេងហាក់ដូចជាមានប្រតិកម្មខ្លាំងពេកទៅនឹងសង្រ្គាមនេះ។

លោកបានបន្តថា ទីផ្សារដំបូងឡើយ ត្រូវគេជឿថា ជម្លោះនេះនឹងនាំឱ្យមានការបាត់បង់ការផ្គត់ផ្គង់ប្រេងពី៣ទៅ៤លានបារ៉ែលក្នុងមួយថ្ងៃ ប្រហែល៤ភាគរយ នៃការផ្គត់ផ្គង់ប្រេងពិភពលោកពីប្រទេសរុស្ស៊ី។

បញ្ហានេះបានបណ្តាលឱ្យអង្គការ OPEC និងប្រទេសមិនមែនជាសមាជិកអង្គការ OPEC និងទុនបម្រុងប្រេងយុទ្ធសាស្ត្ររបស់សហរដ្ឋអាមេរិក បង្កើនការផ្គត់ផ្គង់ប្រេងប្រហែល៥,៤លានបារ៉ែល ក្នុងមួយថ្ងៃ។

ប្រទេសរុស្ស៊ី ជាប្រទេសនាំចេញប្រេងធំជាងគេទីពីរ បន្ទាប់ពីអារ៉ាប៊ីសាអូឌីត ដោយរុស្សីមិនបានកាត់បន្ថយការនាំចេញរបស់ខ្លួនទេ ហើយប្រឈមមុខនឹងការដាក់ទណ្ឌកម្មលើការនាំចេញប្រេងពីអាមេរិក និងសម្ព័ន្ធមិត្ត រុស្ស៊ីបាននាំចេញប្រេងកាន់តែច្រើនទៅកាន់ឥណ្ឌា និងចិន។

លោក Sirawish បានបន្តថា លទ្ធផលនេះបាននាំឱ្យតម្លៃប្រេងពិភពលោកបានធ្លាក់ចុះ ទោះបីជាបច្ចុប្បន្នវានៅតែស្ថិតក្នុងកម្រិតខ្ពស់ប្រហែល៩០ដុល្លារក្នុងមួយបារ៉ែល ដែលមួយផ្នែកបណ្តាលពីតម្លៃដឹកជញ្ជូនខ្ពស់ សម្រាប់ការដឹកជញ្ជូនទៅកាន់ប្រទេសឥណ្ឌា និងប្រទេសចិន៕

LEAVE A REPLY

Please enter your comment!
Please enter your name here