អឺរ៉ុបដុតរោលសង្រ្គាមអូនបន្លាយបន្ត ដោយផ្តល់ជំនួយថ្មីឲ្យអ៊ុយក្រែនក្នុងទំហំទឹកប្រាក់២,៥៧ពាន់លានដុល្លារ

ដោយៈ សុខុម

ក្រុងគៀវ: ប្រទេសអ៊ុយក្រែន ទទួលបានជំនួយថ្មីចំនួន២,៥៧ពាន់លានដុល្លារអាមេរិក ដែលជាជំនួយម៉ាក្រូហិរញ្ញវត្ថុពីសហភាពអឺរ៉ុប កាលពីថ្ងៃអង្គារ ទី២២ ខែវិច្ឆិកា។ នេះបើយោងតាមការបញ្ជាក់ពីរដ្ឋមន្ត្រីក្រសួងហិរញ្ញវត្ថុអ៊ុយក្រែន លោក Serhiy Marchenko។

លោក Serhiy Marchenko បានសរសេរបង្ហោះលើបណ្ដាញទំនាក់ទំនងសង្គម Twitter ថា “ចំនួនជំនួយសរុបដែលសហភាពអឺរ៉ុប ផ្តល់ឱ្យប្រទេសអ៊ុយក្រែន ចាប់ពីថ្ងៃទី២៤ ខែកុម្ភៈ បានឈានដល់ជាង៦,៨៨ដុល្លារអាមេរិករួចហើយ”។

នាយករដ្ឋមន្ត្រីអ៊ុយក្រែន លោក Denys Shmyhal ក៏បានសរសេរបង្ហោះលើបណ្ដាញទំនាក់ទំនងសង្គម Twitter ដែរថា ជំនួយថ្មីនេះបង្ហាញពី “ជំហានមួយទៀតនៃសាមគ្គីភាព” និងបានសម្តែងការដឹងគុណចំពោះក្រុមមេដឹកនាំសហភាពអឺរ៉ុប។

សង្គ្រាមរវាងមហាអំណាចរុស្ស៊ី ដែលជាអតីតមេសហភាពសូវៀត និងប្រទេសអ៊ុយក្រែន ដែលជាអតីតសមាជិកសភាពសូវៀត បានផ្ទុះឡើងផ្អើលពេញពិភពលោក ក្រោយពីប្រធានាធិបតី វ៉្លាឌីមៀ ពូទីន បានបញ្ជាឱ្យកងទ័ពរុស្ស៊ី ចូលឈ្លានពានប្រទេសអ៊ុយក្រែន នៅថ្ងៃទី២៤ ខែកុម្ភៈ ដើមឆ្នាំ២០២២។

យោងតាមគេហទំព័ររបស់ធនាគារពិភពលោក ដែលបានចុះផ្សាយកាលពីខែកញ្ញា កន្លងទៅបង្ហាញថា ប្រទេសអ៊ុយក្រែន នឹងត្រូវការថវិការហូតដល់ប្រមាណ៣៤៩ពាន់លានដុល្លារអាមេរិក សម្រាប់ស្ដារ និងកសាងប្រទេសឡើងវិញ ក្រោយភ្លើងសង្គ្រាមរលត់។

សារព័ត៌មាន The Wall Street Journal បានចុះផ្សាយកាលពីខែកញ្ញាដដែលថា សង្គ្រាមអ៊ុយក្រែន នឹងធ្វើឱ្យសេដ្ឋកិច្ចទូទាំងពិភពលោកទទួលរងការខាតបង់ រហូតដល់ទៅ២,៨ទ្រីលានដុល្លារអាមេរិក នៅត្រឹមដំណាច់ឆ្នាំ២០២៣ និងកើនឡើង ច្រនជាងនេះ ប្រសិនបើរដូវរងាខ្លាំងធ្វើ  ឱ្យវិបត្តិថាមពលនៅអឺរ៉ុប កាន់តែធ្ងន់ធ្ងរ។ នេះបើយោងតាមការលើកឡើងរបស់អង្គការដើម្បីកិច្ចសហប្រតិបត្តិការ និងអភិវឌ្ឍន៍សេដ្ឋកិច្ច (Organization for Economic Cooperation and Development)៕ Reuters៕