ដោយ: លាងហួរ
សៀងហៃ: ទំហំពាណិជ្ជកម្មបរទេសរបស់ក្រុងសៀងហៃបានកើនឡើង៥,៣ភាគរយពីមួយឆ្នាំទៅមួយឆ្នាំ កើនដល់៣,៤៦ពាន់ពាន់លានយ័ន (ប្រហែល៤៨៣ពាន់លានដុល្លារអាមេរិក) ក្នុងរយៈពេល១០ខែដំបូង នៃឆ្នាំ២០២២នេះ។
ទំហំនៃការនាំចេញរបស់ទីក្រុងសៀងហៃ បានឈានដល់១,៤១ពាន់ពាន់លានយ័ន ពោលគឺកើនឡើង១២,៥ភាគរយ ចំណែកទំហំនៃការនាំចូលរបស់ទីក្រុងដ៏ធំមួយនេះបានកើនឡើង០,៩ភាគរយ ដល់២,០៥ពាន់ពាន់លានយ័ន ក្នុងអំឡុងខែមករា ដល់ខែតុលា។
នាយកដ្ឋានគយក្រុងសៀងហៃ បានឱ្យដឹងថា ទំហំពាណិជ្ជកម្មរបស់ទីក្រុងនេះ ក្នុងអំឡុងពេលនោះ មានប្រហែល១០ភាគរយ នៃទំហំពាណិជ្ជកម្មសរុប របស់ប្រទេសចិន។
បណ្តាសហគ្រាស ដែលផ្តល់មូលនិធិពីបរទេសក្នុងទីក្រុងសៀងហៃ បានរួមចំណែក៦១,២ភាគរយ នៃទំហំពាណិជ្ជកម្មបរទេស ខណៈការនាំចូល និងការនាំចេញនៃវិស័យឯកជន បានកើនឡើង១៣,៦ភាគរយពីមួយឆ្នាំទៅមួយឆ្នាំ ដើម្បីក្លាយជាម៉ាស៊ីនកំណើនដ៏សំខាន់ របស់ទីក្រុងពាណិជ្ជកម្មបរទេសមួយនេះ។
ក្នុងអំឡុងនេះ ទំហំនៃការនាំចូល និងនាំចេញរបស់ទីក្រុងសៀងហៃទៅកាន់ប្រទេស នៅតាមបណ្តោយខ្សែក្រវាត់ និងផ្លូវ បានហក់ឡើងដល់ប្រមាណ៧៨៣ពាន់លានយ័ន ដោយកើនឡើង៦,៨ភាគរយ។ ចំណែកឯទំហំពាណិជ្ជកម្មជាមួយសមាគមប្រជាជាតិអាស៊ីអាគ្នេយ៍ បានកើនឡើង៦,៦ភាគរយ ឈានដល់ប្រមាណ៤៦៧ពាន់លានយ័ន៕
