ដោយ: លាងហួរ
ហ្សាការតា: ធនាគារកណ្តាលនៅតំបន់អាស៊ីអាគ្នេយ៍ ចំនួន៥បានចុះហត្ថលេខាលើអនុស្សរណៈ នៃការយោគយល់គ្នាស្តីពី ការទូទាត់ឆ្លងព្រំដែនក្នុងតំបន់ នៅក្នុងព្រឹត្តិការណ៍មួយ មុនពេលកិច្ចប្រជុំកំពូលG20 នៅកោះបាលីមកដល់។
ប្រទេសទាំង៥នោះរួមមាន ឥណ្ឌូណេស៊ី ម៉ាឡេស៊ី ថៃ ហ្វីលីពីន និងសិង្ហបុរី។
នៅក្នុងពិធីចុះហត្ថលេខានេះ ទេសាភិបាលធនាគារកណ្តាលឥណ្ឌូណេស៊ីលោក Perry Warjiyo បានមានប្រសាសន៍ថា ការតភ្ជាប់ប្រព័ន្ធទូទាត់គ្នាក្នុងតំបន់ នឹងដំណើរការដោយប្រើលេខកូដឆ្លើយតបរហ័ស(QR)។
លោកក៏បានមានប្រសាសន៍បន្តផងដែរថា ការទូទាត់រូបិយប័ណ្ណក្នុងស្រុកនឹងត្រូវបានប្រើប្រាស់ ដូច្នេះយើងនឹងមិនចាំបាច់បំប្លែងទៅជាប្រាក់ដុល្លារអាមេរិកឡើយ។
លោក Warjiyo បានបន្ថែមថា ប្រទេសឥណ្ឌូណេស៊ីបានភ្ជាប់ប្រព័ន្ធទូទាត់របស់ខ្លួនដោយប្រើQR code ជាមួយប្រទេសថៃកាលពីដើមឆ្នាំ២០២២នេះ ហើយនឹងតភ្ជាប់ជាមួយបណ្តាប្រទេសផ្សេងទៀត ក្នុងពេលឆាប់ៗ។
កិច្ចព្រមព្រៀងនេះ គ្របដណ្តប់លើការតភ្ជាប់ប្រព័ន្ធទូទាត់លក់រាយ ទោះបីជាមានផែនការបង្កើនភាពជាដៃគូ ទៅជាកម្រិតលក់ដុំ និងរូបិយប័ណ្ណឌីជីថលរបស់ធនាគារកណ្តាលក៏ដោយ។
នៅក្នុងសេចក្តីថ្លែងការណ៍ តាមរយៈវីដេអូនៅក្នុងពិធីនេះ ប្រធានាធិបតីឥណ្ឌូនេស៊ីលោក Joko Widodo បានថ្លែងថា លោករំពឹងថាគំនិតផ្តួចផ្តើមការទូទាត់ឆ្លងព្រំដែន នឹងត្រូវបានពង្រីកដល់កម្រិតពិភពលោក៕
