ដោយ: លាងហួរ
ហុងកុង: សេដ្ឋកិច្ចរបស់ទីក្រុងហុងកុង បានធ្លាក់ចុះ៤,៥ភាគរយនៅក្នុងត្រីមាសទី៣ ធៀបនឹងឆ្នាំ២០២១ ដែលបណ្តាលមកពីការកើនឡើងនៃអត្រាការប្រាក់ជា សកលនិងការធ្លាក់ចុះនៃពាណិជ្ជកម្ម។
វាគឺជាការធ្លាក់ចុះក្នុងត្រីមាសទី៣ជាប់ៗគ្នា ពីមួយឆ្នាំទៅមួយឆ្នាំសម្រាប់ផលិតផលក្នុងស្រុកសរុប(GDP) របស់ទីក្រុងហុងកុងដែលជាមជ្ឈមណ្ឌលហិរញ្ញវត្ថុអាស៊ី ហើយនេះជាការធ្លាក់ចុះដ៏អាក្រក់បំផុត ចាប់តាំងពីត្រីមាសទីពីរនៃឆ្នាំ២០២០។
រដ្ឋបាលហុងកុង បានបន្ទាបការព្យាករណ៍ អំពីកំណើនសេដ្ឋកិច្ចពេញមួយឆ្នាំរបស់ខ្លួន មកនៅត្រឹមដក៣,២ភាគរយ ពីចន្លោះ០,៥ភាគរយ និងដក០,៥ភាគរយ ដោយលើកឡើងពីទស្សនវិស័យ កំណើនសេដ្ឋកិច្ចពិភពលោកដែលកាន់តែអាប់អួរ។
តាមរយៈសេចក្តីថ្លែងការរបស់អ្នកនាំពាក្យ រដ្ឋបាលទីក្រុងនេះបានបង្ហាញថា បរិយាកាសខាងក្រៅ ដែលកំពុងតែអាប់អួរខ្លាំងឡើង នឹងបន្តបង្កជាសម្ពាធយ៉ាងខ្លាំងលើការនាំចេញរបស់ហុងកុង ហើយភាពតានតឹងភូមិសាស្ត្រនយោបាយ និងភាពមិនច្បាស់លាស់ លើជំងឺរាតត្បាតនឹងបង្កជាហានិភ័យបន្ថែមមួយកម្រិតទៀត។
លោក Samuel Tse សេដ្ឋវិទូនៅធនាគារDBS Bank បានមានប្រសាសន៍ថា ទស្សនវិស័យសេដ្ឋកិច្ចរបស់ហុងកុង នៅតែមានភាពអាប់អួរនៅលើគ្រប់វិស័យ ប្រសិនបើព្រំដែននៅតែបន្តបើក ដោយផ្នែកខ្លះៗនៅក្នុងត្រីមាសទី៤ ហើយពាណិជ្ជកម្មក្រៅប្រទេស នឹងបន្តប្រឈមមុខនឹងសម្ពាធដដែល។
កាលពីខែកញ្ញាកន្លងទៅ ទំហំនៃការនាំចេញទំនិញសរុបរបស់ហុងកុងបានថយចុះ១៥,៣ភាគរយ ធៀបនឹងឆ្នាំមុន ដោយទំហំនៃការនាំចេញសរុបទៅកាន់សហរដ្ឋអាមេរិក បានដាំក្បាលចុះ៣០,៧ភាគរយ៕
